محموعه اشعار و نوحه‌های ترکی حاج صادق تائب تبریزی

 

احوالات حضرت زینب کبری (سلام الله)

 
ایدنده زینب مظلومه ترک دنیانی
 
یانیندا اولمادی جان استه یارو اعوانی
 
کسیدیلر یانینی حال احتضارینده
 
آلیدیلر اورگیندن غم فراوانی
 
گوریدیلر نجه قارداش محبتی دلده
 
جهانی ترک ایدوراول رافت و وفا کانی
 
باسوبدی سینه سینه پاره پاره بیرکوینک
 
او کوینگی که آلوراوندان عطرجانانی
 
دولی گوزیله باخورحسرتیله صاق و صولا
 
عیان اولورکه اونون واردی دردپنهانی
 
مداد اشک ملالیله خامه مژگان
 
یازاردی صفحه رخسارینه بو عنوانی
 
حسین حسرتیله جان ویرور بلالی باجون
 
وطندن ایلدن اوزاق دلده آه و سوزانی
 
ایدوبدی لوح دله حک نقش تصویرین
 
باخور اورک گوزی گوزدت توکورجگرقانی
 
عیاندی قارداشی گوزلرباجی الن ساعت
 
خصوص او باجی که قارداش اولا اونون جانی
 
حین اوزون بلوسن گوزلریم قالوب یولدا
 
گل ای گلن یولوون بو بلالی قربانی
 
او زینبم چوله دوشدوم یارالی سندن اوتور
 
هامی مصیبته وقف ایلدیم قوری جانی
 
سنین یولوندا منه چوخ وورولدی دل یاراسی
 
ایله یارا که نه وار مرحمی نه درمانی
 
سنین یولوندا منه خارجی دیدی اشرار
 
سنین یولوندا من اولدوم حسین خرابه نشین
 
بهشت فرض ایلدیم کنچ بیت الاحزانی
 
همین خراتبه ده بیر گوهرایلدیم مدفون
 
آدی رقیه گلستان دین نواخوانی
 
نجه رقیه سارالموشدی بیرساری گل تک
 
خزانه گیتدی اونون عمرینین گلستانی
 
سنون یولوندا آغاردی باشیم قرالدی قولوم
 
سنین یولوندا قد سرویم اولدی چوگانی
 
سنون یولوندا حسین درده مبتلا اولدوم
 
اودرد سالدی ایاقدان بو خانه ویرانی
 
سنین یولوندا ایله داغلانوب منیم اورگیم
 
که لاله اوندان آلوبدوراو رنگ حمرانی
 
یارالی منده سنین تک یارالی جان ویرورم
 
بو عمرعاریه مین ختم اولوبدی دورانی
 
بو صون نفسده گینه سالمارام آدین دلدن
 
بو یرده صورته سالام تمام معنانی
 
بو کوینگین باسوب آغو شه عطریوی آلام
 
جهانه نشر ایدرم بیر محبت اعلانی
 
حسین بیرجه نولی ایلسن قدم رنجه
 
ویرنده جان سالاسان یادیوه بو نالانی
 
یانیمدا یوخدی آنام اوغلی آل  هاشیمدن
 
سالالا یاده بو آق زلفی تک پریشانی
 
جنازه می ایده لرحمل قبرایاقینه
 
بو یرده دفن ایده لر یادگارزهرانی
 
یادیندا وار که ویرنده یارالی جان یارالی
 
ایدنده قانویله لاله زارمیدانی
 
گلوب اودم باجی قارداش محبتی جوشه
 
الیمدن آلدی منیم طاقت و توانانی
 
دوزنمدیم باشین استنده حاضراولدوم من
 
دلیمده ناله وای قارداشم وای عنوانی
 
گل ایمدی سنده منیم باشیم استه جان ویرورم
 
بو گلماقیندا یقین واررضای ربانی
 
اله گتور بو بلالی باجون سینق قلبین
 
شکسته دلده دور الله یوخدی کتمانی
 
باجین سور بلوسن  چوخ صدای قرآنون
 
تلاوت ایله اوزون باشیم استه قرانی
 
حسین محبتی دلده آلوبدی سینه سینه
 
او چوخلی اوخ وورولان کوینگی چیخوب جانی
 
یوموب او گوزلری که قتلگاهی گورموشدی
 
سرشکیله سولاموشدی او قانلی میدانی
 
یوموب او گوزلری که گوردی الدوروله سوسوز
 
کنارنهریده اشرار شاه عطشانی
 
او الدی چولقادی آفاقی ظلمت حسرت
 
گلینجه منتقم اولماز دوباره نورانی
 
بلنمورم که ویروب غسل کیم ایدوبدی کفن
 
ترابه کیم تاپوشوردی او سترکبرانی
 
ولیک واردی یری غسلینی ویرن یانسون
 
گورن زماندا همان نیل فام اعضانی
 
شماریه گتوره تازیانه یرلرینی
 
ایده مجسم اونون چکدوقی بلایانی
 
گلوب دله باشی استه یانقلی دللریله
 
بیر اوخشیا آنالارتک او مهد علیانی
 
اولوبدی منزل (طوریده)بو سوزه بانی
 
بیراکبرآدلی شه تشنه لب نواخوانی
 
دوزوبدی رشته نظمه بو گوهری (تایب)
 
او گوهراسته ایدوب دراشکین ارزانی
 
خدا نصیب ایله بیرقبر زینب استه گیده
 
همی بو جمع همی سوز یازان همی بانی
 

شاعر : مرحوم تایب تبریزی

 
*************
 

زبانحال حضرت موسی ابن جعفر (علیه السلام)

 
ای خدا عشقونده زندان باغ جنّتدور منه
 
گوشه ی زنداندا جان ویرماق سعادتدور منه
 
تاپموشام بو یرده اوز آختاردیقیم دلخواهیمی
 
ایتموشم دلخواهیمه بسته دل آگاهیمی
 
قیلموشام روشن بو ظلمت ایوده شمع آهیمی
 
شمع آهیم، ظلمت ایو، شان و شرافتدور منه
 
صفحه ی عشقه لوای فتحی یارب وورموشام
 
باده ی عشقیله بو دل جامینی دولدورموشام
 
ایتموشم ترک علایق، بزم خلوت قورموشام
 
گوشه ی زندان عجب بیر بزم خلوتدور منه
 
شمع عشقه یانماقا پرواسیزام پروانه دن
 
وصل جانان آختاران عاشق ایدر پروا ندن
 
بزم راز عشقی خالی ایتموشم بیگانه دن
 
آشنا بو یرده بو عشقی محبّتدور منه
 
ای خدا حسرت چکردیم بیله خلوت منزله
 
تا او خلوتده یته نقصان عهدیم کامله
 
سالموشام آختاردیقیم خلوت یری ایمدی اله
 
عمریدن آختاردیقیم ساعت بو ساعتدور منه
 
کنج زنداندا اولوب بیر بو گیجیله گوندووزم
 
نوش جاندور ساغر صهبای غم، یوخدور سوزوم
 
ورد و ذکریم یا هُوَ المَحبوبدور، یرده یوزوم
 
گوشه ی زندان دگول، دارالعبادتدور منه
 
خوش دوشر معنای عشقی صورته بوردا سالام
 
سویدوقونجا ایلیوب یارب عبادت کام آلام
 
دشمنیم قویمور ولی اوز حالیمیله من قالام
 
فکری هر ساعتده اظهار خصومتدور منه
 
اولموشام چون طائر بی پر گرفتار قفس
 
یوخدی بیر کیمسه منه فریادرس ای دادرس
 
بو سیزیلتیم دمبدم اولموش منیله هم نفس
 
هم نشین دائم بو یرده رنج و زحمتدور منه
 
گوشه ی زندان نه مدّتدور مکانیمدور منیم
 
هر نفسده هر نفس سوز نهانیمدور منیم
 
کُنده و زنجیر ایاقدا هم زبانیمدور منیم
 
همدمیم محنتدی، مونس درد حسرتدور منه
 
واردی سینمدی منیم بی حدّ نسگل یاره سی
 
بیر یانا بو نسگلیم بو اودلانان دل یاره سی
 
طعن ایدور سند ابن شاهک چوخ وورور دل یاره سی
 
هر مصیبتدن چتین طعن و شماتتدور منه
 
قورتاران ای یوسف صدّیقی قعر چاهیدن
 
حَرِّ ناری دور ایدن جدّیم خلیل اللهیدن
 
قیل منی آزاد شرّ دشمن گمراهیدن
 
بو حیاتیمدن گوارا حال رحلتدور منه
 
خوشدی یارب جان ویروب من قرب جانانه چاتام
 
ماسِواللهی مقام قربیده گوزدن آتام
 
چوخ یوروب ظلمیله دشمن قبریده راحت یاتام
 
بیله قالماقدان اُلوم واقعده راحتدور منه
 
 ائی آرالی گوشه ی غربتده جان ویرّم خدا
 
نه قیزیم معصومه واردی دردیمی دلدن آلا
 
گوزلریم یولدا قالوبدور گلدی نه اوغلوم رضا
 
قول بویون اولماق اونیله عمده نیّتدور منه
 
((تائبم)) خدمتگذار خاندان عترتم
 
صدقیله سیز خاندانه کمترین بو نوکرم
 
بیر برات بیت حق آل حقدن ای کان کرم
 
ایده آلیم دلده بیر وقفه زیارتدور منه
 
شاعر : مرحوم حاج صادق تائب تبریزی
 
*********************
 

زبانحال حضرت امام حسن مجتبی (علیه السلام)

به حضرت ابوالفضل العباس (علیه السلام)

در شهادت امیرالمومنین حضرت علی (علیه السلام)
 
مرتضی هجرینده صبر ایت با شهامت قارداشیم
 
ای حسینین سر سباهی شیر صولت قارداشیم
 
گرچه با جادور گلوب داده دوتاق دائم عزا
 
اخرین ساعت ولی ایلوب وصیت مرتضا
 
صبر ایداق اوندان صورا بیز ایتمیاق داد و نوا
 
ایلیاق لازیمدی بو امره اطاعت قارداشیم
 
ای اتام حیدر باخشلی بیله بوزما حالیوی
 
توکمه گوزدن گل یوزه چون زاله اشک الیوی
 
خاطریم درده گلور گوردوقجا بو احوالیوی
 
ارتوری بو داغلانان سینمده حسرت قارداشیم
 
ایلیوب خورشید دین برج شهادتده مقام
 
دودمان مصطفایه چوکدی بیر ابر ظلام
 
استراحت ال طاهایه داخی اولدی حرام
 
تبمروق بیرده بلایادن فراغت قارداشیم
 
گورسنور بو ماجرادن زار و مغموم اولماقیم
 
حقیم الدن گیتماقی ظلمیله مظلوم اولماقیم
 
طعن دشمن گورماقیم مظلوم و مسموم اولماقیم
 
اقتضا ایلوب بو اوضاعی مشیت قارداشیم
 
اخر عمرینده سیلردی مرتضی گوز یاشیوی
 
بیر وصیتله اوجالداردی وفالی باشیوی
 
بیر بیریزه تابشوروب سنله حسین قارداشیوی
 
بیر بیریزدن ایتمیون بیر لحظه غفلت قارداشیم
 
ویر رضا قارداش قضایا امرینین اجراسینه
 
غیظه گلمه غوطه ور اولما غضب دریاسینه
 
قوت بازووی سخلا کربلا صحراسینه
 
ویر او صحراده نشان سهم و صلابت قارداشیم
 
سو یولین باغلار او یرده ظلمیله اهل ستیز
 
اودلانار سوز عطشدن عترت شاه حجیز
 
چکنیوه سال بیر سو مشکی ال اله شمشیر تیز
 
تشنه لب اطفاله قیل فکر سقایت قارداشیم
 
گر فرات السان او گون رسم وفادن گیچمه سن
 
یان سوسوزدان نفسیوی نفس حسیندن  سیچمه سن
 
نهریدن چیخ تشنه الدور نفسیوی سو ایچمه سن
 
قیل مواسات ایله بیر کسب شرافت قاردلشیم
 
مرکب استونده او گون محکم ایله زانووی سن
 
هر طرفدن گلسه اوخ خم ایلمه ابرووی سن
 
ویر نشان اشرار کینه قوت بازووی سن
 
چنگ ایله ای شیر اجام شجاعت قارداشیم
 
ای اتام حیدر نشانی بوزما اوز افکاریوی
 
چک اتام حیدر کیمی شمشیر اتشباریوی
 
وور داغوت اعدانی گوستر دشمنه کرداریوی
 
ایله اهل کینه دن سلب جسارت قارداشیم
 
حمله ایلر هر طرفدن استیوه فوم شقی
 
الده تا وار قدرتون قویما یخلسین بیدقی
 
چون همین بیدقدی قارداشیم حسینین رونقی
 
یاتسا بیرق یوز ویرر اطفاله وحشت قارداشیم
 
(تائبه)دائم اولوبدور خامه غم همزبان
 
صرف ایدر عمرین یازارنوحه بیزه هر دم هر ان
 
ایستروق حقدن اونا لطف ایلسون  طبع روان
 
الذبیغمبر غمین ایتسون کتابت قارداشیم
 

شاعر : مرحوم حاج صادق تایب

 
******************
 

زبانحال حضرت زینب کبری (سلام الله) به برادرشان

 
گل قارداش حسین گور نجه دلخسته دی زینب
 
جانان یولونی گوزلوری جان استه دی زینب
 
ایلدن آرالی جان ویروری قلبی شکسته
 
گل صون نفسیمده باشیمی آل دیزین استه
 
غربتده وطنسیز الورم آغلیانیم یوخ
 
حسرتله یانوب سینه سینی داغلیانیم یوخ
 
جان استه منیم گوزلریمی باغلیانیم یوخ
 
گل آغلا موشام من سنه سنده منه آغلا
 
قارداش اوزون آغلا گوزیمی لطف ایله باغلا
 
من بیر گلیدیم باد جفائیله سارالدیم
 
لاله کیمی بو داغلی دله داغ دل ألدیم
 
بانوی حجازیدیم عجب گونلره قالدیم
 
دوشدوم اوزاقا طایفه دن خویش و ایلیمدن
 
بیر کیمسنه یوخ حالی اولا درد دلیمدن
 
یاندی اورگیم بسته تار محن اولدوم
 
بیر پایه ده مظلومه دور زمن اولدوم
 
ایتدیم وطنی ترک جلای وطن اولدوم
 
سالدی منی جبریله عدو داغ داشا قارداش
 
چوللرده من اوز عمریمی ویردیم باشا قارداش
 
بو رسمیدی غم یولداشی یولداشینی گوزلر
 
رخساره توکر گوزلری گوز یاشینی گوزلر
 
جان استه عیاندور باجی قارداشینی گوزلر
 
درک ایله باجین زینب مظلومه ویرور جان
 
گل زینبین اولسون او گلن یولارا قربان
 
مشکل او گوزل مصرعیوی گوزدن اتیدیم
 
یا مدفنیوی روضه رضوانه سا تیدیم
 
فکریم بویودی منده جوارینده یاتیدیم
 
دنیا بویوجا مدفن پاکینده قالیدیم
 
تا عالم محشر او گوزل عطرین آلیدیم
 
قارداش باجی گل بلبلدوق بیر جه بوداقه
 
بیر عشق و محبت بیزی آلموشدی قوجاقه
 
آیریلماقا قویمازدی همین عشق و علاقه
 
افسوس سنی امر قضا مندن آیردی
 
آیریلمازیدیم جبر منی سندن آیردی
 
غملر ایلیوب گر چه منیم روحیمی خسته
 
اما دل اولوب مهر و وفا تارینه بسته
 
پیراهن صد چاکین آلوب سینمین استه
 
گزلینده اولان عشقی حسین فاش ایدرم من
 
جان نقدینی بو کوینگه شاباش ایدرم من
 
اوز عشقیمی عشاقه نشان ویرم حسینیم
 
رمزیله اونا شرح و بیان ویرم حسینیم
 
یراهنین آغوشیده جان ویرم حسینیم
 
بو عشق و علاقم اولا عالملره اعلان
 
بلسونله هامیقارداشا اولدی باجی قربان
 

شاعر : مرحوم تائب تبریزی

 
*********************
 

قسمتی از اشعار حضرت علی اصغر (علیه السلام)

 
اوخ دگنده دست حقین مرغ دست آموزینه
 
بیر قانادلاندی عدونین ناوک دلدوزیته
 
قرص مه تک قان سپیلدی  چهر چرخ افروزینه
 
آخدی دینین نجم رخشانی حبینی یا حسین
 
اوندا که میداندا محو عشقیدی بو شیر خوار
 
انبیا ایلردی حیرتله او احواله نظار
 
نقد جانین گوردولر جانانینه ایتدی نثار
 
قالدیلار بو عشق حیرانی حبیبی یا حسین
 
مکتب گهوارهده قورتاردی تحصیلاتینی
 
ألدی اوز تصدیقینی گوستردی معلوماتینی
 
وزدی معلوماتی آل هند تشکیلاتینی
 
وار بونون تحسین شایانی حبیبی یا حسین
 
ای وجود نازنینی یرده رحمت سایه سی
 
صبر ایله ای انبیادن سخت صبرون پایه سی
 
وار بهشت عدنیده بو شیر خوارین دابه سی
 
حور دور گهواره جنبانی حبیبی یا حسین
 
ایلینمور اوخلانان حلقین نشان ویرسین بالان
 
صورت حالین سنه شرح و بیان ویرسین بالان
 
قوی قوجاقیندن یره آسوده جان ویرسین بالان
 
کشف قیلسین حال معنانی حبیبی یا حسین
 
شاعر : مرحوم تائب تبریزی
 
**********************
 
در مدح حضرت فاطمه زهرا (سلام الله)
 
گوهر بحر وفا فاطمه دی
 
جوهر صدق و صفا فاطمه دی
 
معنی لفظ وفا فاطمه دی
 
لنگر ارض و سما فاطمه دی
 
فاطمه فاطمه دی فاطمه فاطمه دی
 
نوریدور نور خداوند ودود
 
آدی محبوبه ی ذات معبود
 
خلق اولوب خاطرینه هر موجود
 
حضرت خیر نسا فاطمه دی
 
حکمراندور جبروت عالمینه
 
قهرماندور ملکوت عالمینه
 
شرح عنواندی نعوت عالمینه
 
او که وصف ایتدی خدا فاطمه دی
 
شیره ی جان رسول الثّقلین
 
کفو و مانند امام الکونین
 
مادر پاک حسن مام حسین
 
بحر موّاج ولا فاطمه دی
 
حائز وحی نبوّت نسبی
 
شرح معنای فتوّت حسبی
 
گوهر افشان اولونان لعل لبی
 
جوهر صدق و صفا فاطمه دی
 
او که بیر خطبه ی آتش ریزی
 
او که گفتار صفا انگیزی
 
ایلین صحبت نهضت خیزی
 
باطل و حقّی جدا فاطمه دی
 
او که عصمتدی اوتا ستر حجاب
 
او که عفّتدی اونا یوزده نقاب
 
او که اولموش اونا اوز شرمی کتاب
 
معنی شرم و حیا فاطمه دی
 
او که پیغمبره دور نور دو عین
 
مرتضی مسلک و امّ الحسنین
 
گتورن عالم اسلامه حسین
 
فاتح کرب و بلا فاطمه دی
 
او که مرضیّه اونون منصبیدی
 
او که مشهور نماز شبیدی
 
او که احیاگر دین زینبیدی
 
ایلین حشر به پا فاطمه دی
 
«تائب» آل صدق و صفا زهرادن
 
مرضه ایسته شِفا زهرادن
 
آل هامی درد و دوا زهرادن
 
ایلین درده دوا فاطمه دی
 

شاعر : مرحوم تائب تبریزی

 
************************
 

در مدح حضرت فاطمه زهرا (سلام الله)

 
گوهر بحر وفا فاطمه است
 
جوهر صدق و صفا فاطمه است
 
معنی لفظ شِفا فاطمه است 
 
لنگر ارض و سما فاطمه است
 
فاطمه فاطمه است فاطمه فاطمه است
 
مطلع نور خداوند ودود
 
مبدا فیض ز سوی معبود
 
علّت غائی کلّ موجود
 
حضرت خیر نسا فاطمه است
 
فاطمه فاطمه است فاطمه فاطمه است
 
حکمران جبروت است بتول
 
قهرمان ملکوت است بتول
 
شرح عنوان نعوت است بتول
 
وصف کرد آنکه خدا فاطمه است
 
شیره ی جان و دل فخر بشر
 
کفو مولا و علی را همسر
 
مادر پاک شبیر است و شبر
 
بحر موّاج ولا فاطمه است
 
حائز وحی نبوّت نسبش
 
معنی جود و فتوّت حسبش
 
آنکه می ریخت گهر لعل لبش
 
جوهر صدق و صفا فاطمه است
 
آنکه با خطبه ی آتش ریزش
 
آنکه با قول صفا انگیزش
 
کرد با صحبت نهضت خیزش
 
باطل از حق جدا فاطمه است
 
عصمتش آنکه حجابش باشد
 
عفّتش آنکه نقابش باشد
 
شرم و آزرم کتابش باشد
 
معنی شرم و حیا فاطمه است
 
بر رسول آنکه بود قرّة العین
 
مرتضی مسلک و امّ الحسنین
 
داد بر جامعه تحویل حسین
 
فاتح کرب و بلا فاطمه است
 
آنکه مرضیّه بود منصب او
 
دارد آوازه نماز شب او
 
گشته احیاگر دین زینب او
 
محشری کرده به پا فاطمه است
 
شده بانی سخن شهبازی
 
تائبش کرده سخن پردازی
 
با هماهنگی و هم آواز
 
در زبان ذکر ولا فاطمه است
 
 شاعر : مرحوم تائب
 
************************
 

جلالت حضرت زینب کبری (سلام الله)

قسمتی از اشعار مرحوم تائب تبریزی

 
بو بیر عقیله دی شمس هدایتین باجیسی
 
سپر عصمتین عالمده ماه تابانی
 
طلوع ایلدی یثربده باتدی غربتده
 
جهان غصمتی ایتدی غروبی ظلمانی
 
بو بیر خاندی که قارداشدان اوتری دوشدی چوله
 
دلینده قارداش آدی گزدی کوه و صحرانی
 
مقام عشقیده دیوانه ی حسین اولدی
 
گزوب او عشقیله دیوانه وار هر یانی
 
جفا الیله ایدوبله اونی جلای وطن
 
غریبه الدی مکان ایتدی تحت غبرانی
 
بو بیر خانیمدی یزیدین پوزوبدی سلطنتین
 
ایدوبدی مفتضح عالمده آل سفیانی
 
بو بیر خانمدی که گوز یاشی آتشین نطقی
 
دیریتدی حشره کیمی حکم دین و قرآنی
 
بو بیر خانمدی بولود تک دولان زماندا گوزی
 
ایدوبدی گوز یاشی شر منده موج دریانی
 
بو بیر خانمدی که حسرتله خویش و ایلدن اوزاق
 
ایدوبدی ترک بو دنیای محنت افزانی
 
بو بیر خانمدی بوکوب بار غم قد سروین
 
اوجاتدی پرچم اسلامی شرع قرانی
 
بو بیر خانمدی که قارداش جنازه سی استه
 
ایله سیزیلدادی آغلاتدی قوم اعدانی
 
دیدی آتام اولا قربان یارالی قارداشیما
 
که ایکی نهر آراسیندا سو تک آخوب قانی
 
آتام فدا اولا بیر زخمدار جان ویرنه
 
که لاله زار ایلیوب قانی بو بیابانی
 
آتام فدا اولا بیر شاهه گون ایوینده دوشوب
 
قالوبدی قانلی قوم استنده جسم عریانی
 
آتام فدا او حجازی شهه حصاره دوشوب
 
اولوب بو دشتیده اهل عراق مهمانی
 
آتام فدا اولا بیر تاجدار مذبوحه
 
که پیکرینده اونون یوخ یاراسینین سانی
 
آتام فدا اولا بیر پاره پاره گل بدنه
 
دوتوب بلا چولونی عطر روح و ریحانی
 
آتام فدا اولا بیر زخمداره قتلگهی
 
نشان ویرور گورنه گلستان رضوانی
 
آتام فدا او غریبه که غصه لی الذی
 
گتوردی نالیه جنتده روح زهرانی
 
آتام فدا اونا که چاک چاک اعضاسی
 
نشان ویرور گلبرگ برگ خندانی
 
آتام فدا او شهیده خوردا بارماقیندا ویروب
 
ویرنده اهرمنه خاتم سلیمانی
 
آتام او یوسفه قربان که یوخدی پیرهنی
 
دوباره قسمتی اولماز مدینه کنعانی
 
اولوبدی منزل (طوریده) بو سوزه بانی
 
بیر اکبر آدلی شه تشنه لب نوا خوانی
 
دوشوبدی رشته نظمه بو گوهری (تایب)
 
او گوهر استه ایدوب در اشکین ارزانی
 
خدا نصیب ایده بیر قبر زینب استه گیده
 
همی بو جمع همی سوز یازان همی بانی
 
شاعر : مرحوم تائب تبریزی
 
******************
 
احوالات حضرت فاطمه زهرا (سلام الله)
 
یان ای گوگول که دلده کی حسرت شراریدور
 
آغلا گوزوم که آغلاماقین نو بهاریدور
 
زهرا وفات ایدوبدی علی ساخلیوب عزا
 
آغلار گوزیله فاطمه نین سوگواریدور
 
ایلوب وفالی همدمینی اوز الیله دفن
 
همدم اونیله آه دل پر شراریدور
 
گوز یاشینی گوزوندن ایله یاغدیرور یوزه
 
باران ابرگوزیاشینین شرمساریدور
 
آغلارگوزیله قبربتوله خطاب ایدر
 
سنده یاتان رسول خدا یادگاریدور
 
ایله خانومدی مثلی بو دنیایه گلمیوب
 
گلمزنقدر دوره ده دوران مداریدور
 
داغلار بویی اورکده غم و غصه جانویروب
 
همراه اوزیله درددل بی شماریدور
 
آزعمرایدوب آزعمرده چوخ انجیدوبدیلر
 
یورقون گلوبدی خسته و جود نزاریدور
 
قلبینده آرزولری قالموش جوان اُلوب
 
همدم اونیله نسگل اندوه باریدور
 
سنمیش قاپیم یاناندا اونون سروقامتی
 
بیرقانلی آستانه اونون جویباریدور
 
بیر شاخ لاله دورکه سنوب تازه غنچه سی
 
بیرقانلی قتلگاه اونون لاله زاریدور
 
بطحا غزالیدور بونی مجروح ایدوبدولر
 
صیّاد مرگین ایمدی یارالی شکاریدور
 
جان جهاندی جانکیمی باس باغریوا ولی
 
اینجیتمه جسمی دست جفا زخمداریدور
 
پهلو شکسته ال یارا مجروح سینه سی
 
گیزلتدّیقی مصیبتنون آشکاریدور
 
زهرادی واردی زهره جمالینده ال یری
 
لطمه گوروبدی نیلی سیمین عذاریدور
 
یانمازنجه دلیم نیه سنماز منیم بلیم
 
ارخام گیدوب بوکن بلیمی غصّه باریدور
 
شهبازیدیم بتول گیدوب سندی شهپریم
 
پرَسیز قوش آشیانه سی دارالقریدور
 
بیرداغ چکدی سینمه زهراگیدن زمان
 
حشره کیمی او داغین اورک داغداریدور
 
غم غصّه روحومی داخی محبوس ایدوب منیم
 
جاندان اوساندیران منی غملر فشاریدور
 
نه خیروار جهانیده مرضیّه دن صورا
 
مرضیّه سیز جهان منه مِحنت حصاریدور
 
ایکاش اجل تاپا منی منده خلاص اولام
 
بوگوزلریم او پیک اجل انتظاریدور
 
بیجا دگول که من ایدورم اُلماق آرزو
 
بوآرزو آدامسیزین انجام کاریدور
 
قورخوم بودورکه چوخ یاشیم غصه چوخ گورم
 
بو زندگی بوبی کسه روح انزجاریدور
 
مشهوردورآچار دوتولان قلبی آغلاماق
 
امّا منیم دلیم گره دردی کاریدور
 
هرقدرآغلورام گنه قلبیم آچولموری
 
قلبیم اگرچه درد وبلا بردباریدور
 
مرضیّه سیزبوگویلوم آچولسون منیم نجه
 
دلدن سیلینمین غم و مِحنت غباریدور
 
نسگللری دوشر یادیما یانّام آغلارام
 
آغلارگوزوم اُلونجه اونون اشگباریدور
 
تا زنده ام بتول فراقینده آغلارام
 
اُلسمد آه و ناله بو روحیم شعاریدور
 
مشکل بیراولسا حلّ اولی بوگیردارده
 
مظلوم اولان علی ایکی مشکل دچاریدور
 
قبربتولی ترک ایده قویمور علاقه سی
 
چون که بتول روحدن آرتوخ نگاریدور
 
قالسون نجه اوشاقلاری باشسیز قالوبدیلار
 
چوخ ناگران بو بارده قلب فکایدور
 
روحی بو یرده فکری اوشاقلار یانوندای
 
شوره گلن او اودلی دل شورباریدور
 
بوردا علی سیزیلدیری یا فاطمه دیور
 
ایوده گویه چیخان بالالارآه وزاریدور
 
آغلارگوزیله دوردی گیدوب منزله گوره
 
زینب نجه یتیم لرین غمگساریدور
 
گوز یاشینی سیلوب بالالارگورمه سین اونون
 
گوهراولاندا نثاردیدۀ گوهر نثاریدور
 
وارد اولاندا گوردی حسین وای آنا دیر
 
درّ یتیمیله دولی چشم خماریدور
 
آغلارحسن ویرار قزی کلثوم سینیه
 
ایوگلشن عزادی اوشاقلار هزاریدور
 
بلبل لریله اولدی هم آواز باغبان
 
آغلادیلار دیردیلر شیون بهاریدور
 
مولا باخوب بالالارا دولدوردی گوزلرین
 
یعنی علیده فاطمه نین سوگواریدور
 
فرمایش ایتدی زینبیم اوخشا من آغلیوم
 
دورمورگوزومده گوزیاشی غم چشمه ساریدور
 
قزلارآنایه چوخ گوزل اوخشارگوزل قیزیم
 
اوخشا او اوخشاماق آناسیزلار شعاریدور
 
زینب یانقلی اوخشادی شیرحق آغلادی
 
ماتم نشینون آری بو رسم و قرایدور
 
تا آغلادی علی بالالار دگدی بیربیره
 
گویا که آل فاطمه روز شماریدور
 
زینبده آغلاماقی آناسوندان اورگشوب
 
زهرا بلالی زینبین آموزگاریدور
 
((تائب)) ولایت اهلیدی آل رسالتین
 
هم نوحه خوانی دور و هم نوحه نگاریدور
 
بسدور بوافتخار ایکی دنیاده تائبه
 
مولا بویورسا فاطمه خدمتگزاریدور
 
شاعر : مرحوم حاج صادق تائب تبریزی
 
************************
 

زبانحال حضرت معصومه (سلام الله)

 
قم دیارینده باجون معصومه قارداش جان ویرور
 
ورد ایدوب قارداش آدون مهر و وفا اعلان ویرور
 
شوق وصلون باشدا قارداش ایلیوب ترک وطن
 
سندن اوتری چوللره دوشدوم من ای شاه زمن
 
سنسیز اولدوم حیف اولا غربتده پابند محن
 
عکس آماله نتیجه گردش دوران ویرور
 
سالدی تقدیر قضا دامه بو زار و مضطری
 
ایتدی بازار محبّتده بلا سوداگری
 
ایل قبیلمدن اوزاق غربتده اولدوم بستری
 
جام دل شربت یرینه کاسه کاسه قان ویرور
 
عالم مهر و وفاده تیر غم آماجیم
 
پایبند عشقیوم، لطف و عطا محتاجیم
 
سن بُلورسن من نجه قارداش وفالی باجیم
 
من کیمی کیمدور وفا اوسته اوزین قربان ویرور
 
شوق وصلون هجر ایوینده قویمیوب دلده دوزوم
 
آیریلان گوندن وصالون آختارور دائم گوزوم
 
نه علاقم وار سنه بیر سن بُلورسن بیر اوزوم
 
بو علاقه بو وفایه گوزیاشیم میزان ویرور
 
هیچ باجی دوزمز اگر سالسا گوزوندن قارداشی
 
خاصّه من تک باجی، قطع اولموب گوزومدن گوزیاشی
 
گَل آدون ویر ایتمیشم بلبل صفت هر سوز باشی
 
ایسترم قارداش سنی مهریم نه قدر امکان ویرور
 
چوللره دوشدوم وصاله دوندرم هجرانیوی
 
ایلیم قارداش زیارت عارض رخشانیوی
 
درک ایدم جان اوسته بیرده نغمه ی قرآنیوی
 
جان سپاره تازه بیر جان، نغمه ی جانان ویرور
 
هارداسان معصومه نین جانی اولا قربان سنه
 
اولما راضی اشکیم آخسون گوزلریمدن دامنه
 
گَل دلون قربانی جان اوسته اوخی قرآن منه
 
روحیمه لذّت اُلن دم نغمه ی قرآن ویرور
 
آخِرِ عمریمدی قارداش وار دلیمده چوخ سوزوم
 
نه یته بُلدوم وصاله، وار نه هجرانه دوزوم
 
جان ویرن ساعتده یولّاردا قالوب آغلار گوزوم
 
گوزلریم دولموش بولود تک بارش باران ویرور
 
نقش اولوب عکس جمالون دلده کی آئینه مه
 
دوزموشم مهر و محبّت گوهرین گنجینه مه
 
آلموشام آخِر نفسده نامه وی اوز سینه مه
 
نامه وین عطری منه جان اوسته تازه جان ویرور
 
فکر ایدنده حال و قال حضرت معصومه نی
 
ایلوری گوزده مجسّم زینب مظلومه نی
 
سینه ده قارداشینون قانه باتان پیراهنی
 
وای حسینیم وای دیور، قلبینده حسرت جان ویرور
 
اولدی بانی ((تائبا)) بیر اکبر آدلی نوحه خوان
 
سنده یازدون ایلدون بیر خدمت عالی بیان
 
سیز ویرون اوز خدمتوزده همّت عالی نشان
 
اجروزی حتماً جزاده خالق رحمان ویرور
 

شاعر : مرحوم تائب

 
************************
 

در شهادت حضرت امام حسن عسکری (علیه السلام)

 
 امام عسگری رحلت ایدوبدور شیعیان آغلار
 
دیر ایوای بابام ایوی امام انس و جان آغلار
 
فلک آغلار ملک آغلار زمین آغلار زمان آغلار
 
یانار آغلار دیر الدن امام ممتحن گیتدی
 
اولان خلقی حسن خلقی حسن آدی حسن گیتدی
 
حقوقیندن جفائیله اولوب محروم ئولن گیتدی
 
دوشنده یاده بو محنت زمین آغلار زمان آغلار
 
دیر ای ظلم الیله چوخ اولان مظلوم ئولن ایوای
 
اولان اجدادی تک درد آشنا مغموم ئولن ایوای
 
گورن آز عمریله چوخ جوخ جفا مسموم ئولن ایوای
 
ایدر بو سوزلری تکرار امام انس و جان آغلار
 
گورن سانسیز جفا و ظلم لر هر دور دوراندا
 
وئرن عمر شریفین باشه گاهی کنج زنداندا
 
چکن دائم شکنجه قید ظلم قوم عدواندا
 
بو مطلب ذکر اولاندا هم زمین و هم زمان آغلار
 
گه امر معتمد له حجت حق دستگیر اولدی
 
گهی زنداندا زندانبان بی رحمه اسیر اولدی
 
مکانی گه مکان بیر نچه درنده شیر اولدی
 
گوروبلر شیر اونا پابوس اولوب اشگی روان آغلار
 
صفاسی نچه شیرین ایله دوتدی فرد بر فردین
 
سیلردی حجت اللهین لباسینده اولان گردین
 
دیردی ئوز دیلیله هر بیری دلده اولان دردین
 
بلی درد اهلی مولایه آیدر دردین بیان آغلار
 
بلی درنده لر گورجاق تانولار حجت اللهی
 
ولیکن معتمد درنده لر تک تاپموب آگاهی
 
اونی ائتمیشدی ایله کور باطن سلطنت جاهی
 
که قویدی اهل بیت دینی اول شوم جهان آغلار
 
بله اعجازی گوردی معتمد لیک اولمادی بیدار
 
امامین قتلینه بل باغلادی اول مرتد خونخوار
 
امامی ایلدی مسموم پنهانی او بد کردار
 
ایدنده یاد بو ظلمی امام عصر قان آغلار
 
یانار آغلار آتاسین یاد ایدر سرگشته بیداده
 
گهی جدی حسینه دمبدم آغلار گلر داده
 
دیر ایکاش اولیدیم منده سنله قانلو صحراده
 
دیر یا کربلا هر دم ایدر محشر عیان آغلار
 
هزار افسوس جدا اولمادیم اول قانلی صحراده
 
سنی یالقیزلینده کوفیان صحن غم افزاده
 
دینده یالقیزام الله گلیدیم اوندا امداده
 
همان احوالوه سبوحیان قدوسیان آغلار
 
دیدون هل من معین اطرافون آلدی فرقه اعدا
 
اوجالدی هایهو غوغا گران شام ایدوب غوغا
 
اولار یوزمین نفر خونخواریدی سن یکه و تنها
 
ایدنده یاد او حالی گوزلریم هر دم هر آن آغلار
 
چخا حاشا یادیمدان یاندی قلبون احتراقیله
 
باخوب نهره دیردون العطش عطشان دوداقیله
 
سنه اهل جفا یاره ووراردی اتفاقیله
 
او احوالون سالوب یاده هامی کروبیان آغلار
 
یخیلدون ائتدی رنگین ذوالجناحون کاکلین قانه
 
خیام طاهراته یوز قویوب قاچدی یانا یانه
 
دیلینده الظلیمه الظلیمه گلدی افغانه
 
او خونین صحنیه عمه م گوزی تا وار جهان آغلار
 
زبان خامه تائب بیر بیوک غوغایه گویادی
 
دیور قان قتلگاهیندن بیانی محنت افزادی
 
سوزی چکمه اورا قاندان دولی پر موج دریادی
 
سنی ده غرق ایدر هم غرق ایده هم غرق اولان آغلار
 

شاعر : مرحوم تائب

 
********************
 

زبانحال حضرت امام حسین (علیه السلام)

در بالین حضرت ابوالفضل (علیه السلام)

 
قارداشون پوزولدی گورجاق بئله حالی سنده قارداش
 
سنده گوزلرون بیر آچ گور، وار نه حال منده قارداش
 
تا سسون خیامه گلدی، یاندیم اوندا داده گلدیم
 
یاندی سینم، اودلی قلبی تیر حسرتیله دلدیم
 
دلده گل آدون وفالی، دوزمدیم هرایه گلدیم
 
عطر جانفزاوی آلدیم تلدن اننده قارداش
 
عطریوی آلا آلا من، کربلا چولون دولاندیم
 
صاق صولا غمیله حیران، گه گیدوب گهی دایاندیم
 
گوردوم اللرون کسلموش یرده دور علاوه یاندیم
 
بولدوم اللره دوشوبسن، اللرون گورنده قارداش
 
باشون اوستونه یتونجه، گوز یاشیمی قانه قاتدیم
 
اوخلی پیکرون تاپاندا ناله می گویه اوجاتدیم
 
چکدیم اوخلاری یاراندان بیر به بیر کناره آتدیم
 
قلبیمه اوتوردی مین اوخ، هر اوخی چکنده قارداش
 
بو یارالی گل وجوده، اگلشوب نظاره سالدیم
 
یاره اوسته یاره گوردوم، منده قلبه یاره آلدیم
 
قارداشی ئولنلر آنلار، اوندا من نه حاله قالدیم
 
کیم بولر اولار نه حالت قارداشی ئولنده قارداش
 
دوزدی باغبان ایدر غم، گلستان خزان اولاندا
 
بلبلون یرینده باغه، زاغیله زغن دولاندا
 
ناامید اولار چمندن، طرفه گللری سولاندا
 
خار الینده لیک دوزمز، ئوز گلون گورنده قارداش
 
قارداشون وفالی قارداش، چاره سی داخی آزالموش
 
دود آهی اودلی دلدن عرش طاقینه اوجالموش
 
دور بلیم سنوبدی سنسیز، اللریم بلیمده قارداش
 
قدیمی بوکوبدی نالن خیمیه گلنده قارداش
 
ای وفالی چوخدی دردیم، دردیمه شراکت ایله
 
من اوغولسوزام غریبم، حالیمی رعایت ایله
 
یوخ منه ایدن حمایت، دور اوزون حمایت ایله
 
سالما بو حسینی گوزدن، بئله وقته سنده قارداش
 
سن امیر لشکریم سن، من غریب پادشاهم
 
لشگریم سنوب بو چولده بی معین و دادخواهم
 
من سنی پناه بوللم، گر چه عالمه پناهم
 
تک سنه پناه گتدوخ قزلاریمدا منده قارداش
 
وار نه طایفم قبیلم، نه منیم ئیلیم بو چولده
 
نه سسیمه سس ویرن، نه واردی همدلیم بو چولده
 
سنده تشنه جان ویرورسن، گلموری بلیم بو چولده
 
روحیمی منیم آلورسان، بئله جان ویرنده قارداش
 
سن کیمی وفالی قارداش واردی تا جهان تاپولماز
 
آغلیان گلر سنه چوخ، من تک آغلیان تاپولماز
 
چوخلاری یانار، آنان تک لیک بیر یانان تاپولماز
 
حقی وار اگر ئولونجه آغلاسا وطنده قارداش
 
فاطمه آنام ایدوبدور بیر بنای بیت الحزان
 
اوز بالالاریله اوردا دائما اولوبدی نالان
 
اوغلوون دوتوب الیندن، بی بنین آنان پریشان
 
وار نقدر آغلور، اول کلبه حزنده قارداش
 
بو بلالی چولده سنسیز، غنچه گللریم سولالار
 
گوزلری دولی بولود تک، اشک آلیله دولالار
 
قالمارام من اولماسان سن، قیزلاریم اسیر اولالار
 
قولاری ستمله محکم باغلانار رسنده قارداش
 
کیم گوروب سو اوسته سقا، تشنه جان ویره یارالی
 
سرو تک دوشه ایاقدان، جسمی قان ویره یارالی
 
پیکرینده هر یارا بیر گل نشان ویره یارالی
 
وار نه بئله گل، نه بئله سرو بیر چمنده قارداش
 
سن یخلدون ای وفالی، کامه قیزلاریم چاتانماز
 
گوزلرین یولا تیکن لر، سینه حسرتین آتانماز
 
سن دوشوب یارالی یاتدون، بیرده قیزلاریم یاتانماز
 
امن و استراحت اولماز، آل بوالحسنده قارداش
 
کامه چاتمیانلار ایمدی عین مقصده چاتالار
 
سهم و صولتین هراسین، سینه دن داخی آتالار
 
قورخودان یاتانمیانلر مطمئن اولوب یاتالار
 
گورسنر عیان، بشارت، فرقه فتنده قارداش
 
ای وفالی قامتوندن جامه وفانی سویما
 
دویمیوب حسین سندن، سنده اوندان ایمدی دویما
 
ارخاسیزدی بی کمکدی، تک بو قانلی چولده قویما
 
قان توکن گورور حسینون هر یانا دوننده قارداش
 
تک نه باشون اوسته من تک، اودلی درد دل دئن وار
 
خیمه لرده سوزلی جوخدی، بئله حالی بولمین وار
 
گوز تیکوب یولا رقیم تک، یولوی گوزلین وار
 
انتظاریدی قزیم، من آیریلوب گلنده قارداش
 
بولموری هله سوسوزلار مشکه اوخ ایدوب اصابت
 
بولموری دوشوب ایاقدان ظلمیله بو سرو قامت
 
من غریبه بو یخیلموش قامت ایلیوب قیامت
 
قزلاریمدا محشر ایلر حالوی بولنده قارداش
 
نه قویور منی علاقه، قارداشیمی ترک ایدوم من
 
حملنه نه واردی امکان، نه علاج وار نیدوم من
 
نه اولور قویوب یر اوسته، گل جنازه وی گیدوم من
 
نه یوزیله تک گیدوم من، خیمیه گیدنده قارداش
 
(تائبا) واروندی الفت، اهل بیت عصمتیله
 
آل برات کربلا، گئت کربلایه همتیله
 
نهر علقم اوسته ذکر ایت بو سوزی جماعتیله
 
قارداشون پوزولدی گورجاق بئله حالی سنده قارداش
 
شاعر : مرحوم حاج صادق تائب
 
*****************
 
احوالات حضرت امام سجاد (علیه السلام)
 
حضرت سجاد قرخ ایل شادوخندان اولمادی
 
دردینه جز درد دین بیر اوزگه درمان اولمادی
 
کربلاده کربلانین گوردی عاشورا سینی
 
فاطمه اوغلی حسینین محشر کبراسینی
 
قانه غرق اولموشلاری پر موج قان دریاسینی
 
سانما احساساتی دریا تک خروشان اولمادی
 
بیرطرف قانلار سپیلدی ایتدی گلگون داشلاری
 
بیرطرف جام شهادت نوش ایدوب یولداشلاری
 
بیر طرفده قانینه غلطان دوشوب قارداشلاری
 
ایلدی حسرت اولار تک قانه غلطان اولمادی
 
ایتدی اقبال شهادت دین یولوندا اهل دین
 
چاتدیلار بو فیضه یتمیش بیر نفر مرد آفرین
 
اولدی بیله فیضدن محروم فخر الساجدین
 
چوخ چتین گلدی اونا بو امر آسان اولمادی
 
بیرطرف فیض شهادتدن اولوبدی بی نصیب
 
دردی درد اوسته گلوب نه بیر دوا نه بیر طبیب
 
دور و بر بی شرم دشمن ایل اوزاق قالموش غریب
 
دردینه جز درد دین بیر اوزگه درمان اولمادی
 
چوخ سوَردی توپراقا دین اوسته قانی آخماقی
 
سرخ رو قان ایچره قانین چهر دینه یاخماقی
 
چون چتین گلدی دوروب جنگاهه ساکت باخماقی
 
حیف خستیدی قیامه اوندا امکان اولمادی
 
گوردی دشمنلر نجه قلب بتولی اویدولار
 
قزلاری نه وضعیله غارت گونونده سویدولار
 
چوللره یانمیش چادرلاردان چخوب یوز قویدولار
 
هامّی قاچدی سانما بیر فردی گریزان اولمادی
 
خیمه گاه دین یاناندا دوندی شامه گوندوزی
 
ایستدی بوگیروداری گورمه سین حق بین گوزی
 
امر ایدوب قاچدی هامی قالدی یانار اوددا اوزی
 
عمه سی اوددان چخاتدی اوددا سوزان اولمادی
 
گوردی قان دریاده غرق اولموش یارالی نوحینی
 
سو یانیندا تاپدی دینین کشتی مطروحینی
 
ویرمدی الدن گنه روحیۀ پر روحینی
 
ظاهرا پوزقون ولی باطنده پژمان اولمادی
 
خاک و خونیله هم آغوش اولدی جانبازان دین
 
قالدیلار بی سراو خونین چولده سربازان دین
 
سرفراز اولدی جدالرده سرافرازان دین
 
گوردی بو حالی گنه دل صبری تالان اولمادی
 
گوردی غوغائیله دولموش سرزمین کربلا
 
قتل عامیله اولوب خاموش مطلق برملا
 
هر طرف آچمیش گل سرخ شهادت جابجا
 
سانما سونلار کربلا دینی گلستان اولمادی
 
دور ایدوب هربلبل شوریده بیر گل باشینه
 
هر آنا اوغلون تاپوب ویردی خبر گوزیاشینه
 
هربالا اوخشار آتایه هرباجی قارداشینه
 
نینوا دشتی نواسیزبی نواخوان اولمادی
 
خون طاها وعلی و خون زهرا و حسین
 
رگ لرینده جابجا جاری حسینه نور عین
 
ترک ایدوب قانلو بیابانی امام نشأتین
 
بو حیاتی مرگدن واقعده آسان اولمادی
 
بیر طرفدن دست بسته دل شکسته قلبی پاک
 
بیر طرفدن وار قاباقدا سرنوشت هولناک
 
قرخا دین همره یتیم داغ دیده سینه چاک
 
سانما بو مولا اوزی جزه اسیران اولمادی
 
نه اسارت قید کین قوللاردا گوزده اشگ تر
 
بیر حیات مرگبار و محنت افزا بیر سفر
 
نه سفرآدی سفر باشدان باشا خوف و خطر
 
بو اسارتده اونا امنیت جان اولمادی
 
نه سفر دوشموش یول اوسته چوخ غم آور شهرلر
 
هر طرف اهل جنایات خِفا و جَهرلر
 
طعن بیگانه شماتت لر عتاب و قهرلر
 
روبرو وحشی لر اونلان اولدی انسان اولمادی
 
کوفه شهرین دولدوروب باشدان باشا جوش و خروش
 
روبرو حقی دانان دنیاپرست وخود فروش
 
قول قونادسیز قوش کیمی آل پیمبر سربدوش
 
کیم دیر قلب شریفی غنچه تک قان اولمادی
 
ناقۀ عریان لار اوسته پیکر تبداریله
 
روبرو ایله آییلماز یوخلیَن افکاریله
 
یوخلیَن خلقی اویاتدی آتشین گفتاریله
 
اولمیه بیدار او گون روشن مسلمان اولمادی
 
نقطۀ پرگار ایمان اهل کفره دستگیره
 
شیریدی روباه لر مکریله ایتمیشدی اسیر
 
بسته زنجیر اولا عار ایلمز شیر اوغلی شیر
 
دوزدی زنجیره قولی باغلی پریشان اولمادی
 
ویرمدی روحیه سین الدن امام دادخواه
 
گوردی تهدیدات خصمی خسرو اقلیم جاه
 
دشمنه دشمن لر ایچره ووردی ضربه گاه گاه
 
اوز وقارین ساخلادی پابند خذلان اولمادی
 
مجلس ابن زیاده گیتدی قولدا قید کین
 
قتلینه شمشیر کینه چکسدی جلاد لعین
 
وقرینی سندیرمادی اول حجت روی زمین
 
ذره جه دین اوسته اؤلماقدان هر اسان اولمادی
 
اوتدان الهام آلدی زینب بانوی مهدِ وقار
 
ویردی فرمان دوردی آل الله یریندن بیقرار
 
آلدیلار جلاد الیندن عابدی پوزقون قطار
 
عابدین قتلینده اجرا قانلو فرمان اولمادی
 
کوفه ده دللرده قویدی انقلابی بیر اثر
 
پای تخت آل هنده باغلادی بار سفر
 
وارد اولجاق گوردی نه شامات یکسر شور و شر
 
اؤلدوره روحیه سین بو وضع عنوان اولمادی
 
چوخ چتین گلدی اونا شام جفا هنگامه سی
 
دلخراش اولدی اونون شاماتده برنامه سی
 
باشینه اود یاغدیراندا دوتدی اود عمامه سی
 
قوللاری باغلیدی خاموش ایتسون امکان اولمادی
 
چوخ جفا شام ایچره گوردی فرقۀ بیداددن
 
چوخ شماتتلر ایشیتدی قوم بد بنیاددن
 
بارها قورتولدی شَرِّ قان توکن جلاددن
 
استقامتله دایاندی حالی پژمان اولمادی
 
درد و رنجه آشنا ایتدی اونی بیگانه لر
 
گه یری زندان اولوب گه گوشۀ ویرانه لر
 
شمع تک دورین آلوب پرسوخته پروانه لر
 
ایله هیچ پروانیه شمع شبستان اولمادی
 
شاعر : مرحوم تائب
 
**********************
 
ای اوخ
 
اورکدن چخماقون ممکن دگل اینجیتمه جان ای اوخ
 
پرآچ پرآچدوقون بیریاریه اول سایبان ای اوخ
 
یول آچدون حقّه حقّون وار پرآچدون تیز پرگلدون
 
بویوک طوفانلی عمرون شرحین ایتدون مختصرگلدون
 
« الونده نامۀ دعوت گتوردون خوش خبرگلدون»
 
«ایله بیرنامه ایستر سن کیمی نامه رسان گلدون»
 
بو چولده بیکسم گوردون اودور سن قیدیمه قالدون
 
منیم دل دردیمی آلماقلقا بو سمته یو سالدون
 
گلوب یاخشی اوتوردون قلبیمه بو گویلومی آلدون
 
صفا ویردی بو قلبه سن کیمی بیر دلستان ای اوخ
 
اگر چه ظاهرا بیر قان ایچن دلدوز پیکانسان
 
به معنا عاشق جانباز ایچون بیر پیک جانانسان
 
آدوندورجانستان اما حسینه راحت جانسان
 
حسینی ایلدی راحت سنون تک جانستان ای اوخ
 
یانارلی داغ اکبر ایله یاندوردی بو نالانی
 
داموب قان باغریما دوتدی ورم بو قلب سوزانی
 
یتیشدون نیشتر ویردون بوشالدی قلبمین قانی
 
منی ناراحت ایلردی گر آخمازدی بو قان ای اوخ
 
توخوندون قلبیمه هرچند کاری اولدی بو یاره
 
ولیکن تازه دن بیر روزون آچدون کوی دلداره
 
او روزندن باخوب چشم دلیم عکس رخ یاره
 
وجودیم محو عشق حسن یار اولدی اینان ای اوخ
 
داخی من محو عشق دوست اولدوم جان نه لازم دور
 
شهادتدن سوا بو دردیمه درمان نه لازم دور
 
توکولسون قوی بو قان قربان عشقه قان نه لازم دور
 
ثبوت ایلر وفامی قانیم اولدوقجا روان ای اوخ
 
نه مدتدور ایدردی جوش قلبیمده اولان بو قان
 
داشیدی ایلییدی کربلاده بیر بیوک طوفان
 
اولیدیم غرق امّا نگاهه چخیدی کشتی قرآن
 
عجب گلدون بو طوفانی یاراتدون بو زمان ای اوخ
 
گزردیم چوللری مدتدی بو فکرو خیالیله
 
یوزوم گلنار اولا بو قانلی چولده خون آلیله
 
یاخوب روخساریمه دل قانیمی قانلی جمالیله
 
ملاقات ایلرم اوز جدّیمه ویرّم نشان ای اوخ
 
ایدردیم آرزو بو باش بوجان قربان دین اولسون
 
بو باش جان ویرماقیم سر مشق جانبازان دین اولسون
 
فنا فی الله اولوم محکم بو گون بنیان دین اولسون
 
یتوردون عین منظوره بو قربانی عیان ای اوخ
 
دوتولموشدی بو قلبیم من یتیشمیشدیم داخی جانه
 
نه یاخشی قلبیمی آچدون یتوردون وجد شایانه
 
ملاقات ایلرم دلشاد آچیق قلبیله جانانه
 
دیر بو حالیمه احسن حبیب لا مکان ای اوخ
 
نوای واحسینیله بو دشتی گرچه دولدوردون
 
ضعیف اولموشدی دین تزریق خون تشکیلینی قوردون
 
بو چولده پیکردینه حسیندن قان آلوب ووردون
 
بو قان قرآن و دینه ویردی جان جاویدان ای اوخ
 
اگر چه نامۀ (هندی) ایدوب (تائب) سنی مأمور
 
سوزون تعقیب قیلدون دوشدی اما وصلۀ ناجور
 
ایدر اول سالخورده خاطرینه حق اوزی مأجور
 
جوان روحیله ایلوب مطلع سوزده بیان ای اوخ
 
یازوب سوزلرگوزون «هندی» یازار چوخلار اوزی اولماز
 
یازورسان سنده (تائب) سوزلرون سوزلر گوزی اولماز
 
سوزون هرقدر شیرین اولسادا هندی سوزی اولماز
 
سوزونده واردی جان عنوان ایدوب اینجیتمه جان ای اوخ
 
شاعر : حاج صادق تائب تبریزی
 
***************************
 

در احوالات حوادث کربلا

 
تراب بستر فرزند بو تراب اولدی
 
نجه معاویه نین اوغلی کامیاب اولدی
 
علی ولی خدانین قاپوسی باغلاندی
 
حسین ئولدی، پیمبر ایوی خراب اولدی
 
فراتیدن سو ایچوب وحش و طیر هر نه که وار
 
بنات حضرت زهرایه قحط آب اولدی
 
طویوندا اولمادی ممکن عروس یاخسون حنا
 
قولین طناب کسوب، اللری خضاب اولدی
 
او قولاریکه ویرردی جواهره زینت
 
همان او قولاریدی بسته طناب اولدی
 
گونون حرارتی، عریان دوه امان الله
 
او خورداجا بالالار ایسیدن کباب اولدی
 
قطار غم چکلن وقته کوفه و شامه
 
امیر قافله بیر ناخوش انتخاب اولدی
 
توکولدولر دوه دن توپراق اوسته زار و ملول
 
او دوغرانان بدنه زلفلر حجاب اولدی
 
شکسته محمل لیلا یتنده بازاره
 
او بینوا یوزونه زلفدن نقاب اولدی
 
بو شور عشقیدی باشدان، صدا ویرور داشدان
 
بو شوریدن اوجالوب شور انقلاب اولدی
 
او شام شومده شام اولدی نیزده ای داد
 
نجوم دوره ده آی چخدی آفتاب اولدی
 
......................................
 
پیمبر عترتی بزم یزید کافرده
 
گوزونده هر باخانون خارجی حساب اولدی
 
اوپنده چوب حسینین لب گهربارین
 
نثار یوزلره گوزدن اشگ ناب اولدی
 
یزید بسکه تعدیده حدیدن گچدی
 
علی قیزیندان ایله سلب صبر و تاب اولدی
 
آلشدی خاطری، نطقه گلوب دانشدی خانم
 
همین دانشماقا علت او التهاب اولدی
 
یتوردی حق سوزین ایله او بزم باطلده
 
یزید گوردیکه اول بزمده مجاب اولدی
 
شرار غیظ و عداوتله اود دوتوب او لعین
 
گورن زماندا که رسوای شیخ و شاب اولدی
 
گتورمرم دله هرگز دیسم دلیم یانسون
 
نه کلمییه متکلم او دون مآب اولدی
 
بو قدری وار که خانملار تمام آغلادیلار
 
عیان او جمع پریشاندا اضطراب اولدی
 
اگر چه هر نه دئدی بیر به بیر ایشتدی جواب
 
خدا بولور که سوالاته نه جواب اولدی
 
او گون او بزمده یابن الحسن امام زمان
 
نجه دیوم که خانم عموه عتاب اولدی
 
او بزم عیش یزید لعین اولدی سبب
 
حرام عترت اطهاره خورد و خواب اولدی
 
او شهر شومده بیر مدتی خرابه شام
 
مقام و مسکن اولاد بوتراب اولدی
 
نه ایچدیلر سو دویونجا نه میل ایدوبله طعام
 
طعام خون جگر، گوز یاشی شراب اولدی
 
او قدری چکدیلر رنج و محن او گل یوزلر
 
سارالدی رنگده مانند آفتاب اولدی
 
رقیه طاقتینی ایتدی فوج غم تاراج
 
باخوب اونا اوره گی قان خانم رباب اولدی
 
او طفلین حالی هامی کایناتی یاندوردی
 
نه یالقوز عمه آناسی باخوب مصاب اولدی
 
همان گجه که او ویرانه یرده جان ویردی
 
آچوب باش آغلیانی اهل نه قباب اولدی
 
حسین اگر چه هامی ماملکدن ال چکدی
 
ولی هر ایکی جهان مالک رقاب اولدی
 
یزید تختنی وارونه ایلین مطلق
 
فغان و آه یتیمان اول جناب اولدی
 
یازوب بو نوحه نی (عاصی) اگر چه ویردی باشا
 
ولی مقدمه (بیضادن) اکتساب اولدی.
 

11 بیت اول از مرحوم شیخ اسماعیل تائب

و بقیه از مرحوم مشهدی حسن عاصی
 
*************************************
 

حضرت امام حسین (علیه السّلام)

 
تعالی الله عجب کاخ فلک فرسادی بنیادی
 
وروبدور اوج او ادنایه باش قوسین ایوانی
 
سلیمان هاردادی گلسون مُمَرّد صَرحَه سیر ایتسون
 
که دیو و دد یرینده صف چکوبدور حور و غلمانی
 
عیاندور شمسۀ نور حرمدن نور لاهوتی
 
نهاندور تربت مشگ آفرینده سرّ یزدانی
 
بیر آچ اوز آسمان بین دیده وی باخ سطح غبرایه
 
ویرور تمثال عرش حقّی عرضه چار بنیانی
 
غلط دوشدی سوزوم گر وار خدانین عرش اعلاسی
 
بو کاخ اولموش دلیل استوای عرش رحمانی
 
فلک باشین اگر چون دیو تخت جم قباقینده
 
جهانی حلقۀ خاتم ایدر دست سلیمانی
 
حسین بن علی اول شهسوار صحن عاشورا
 
مُبرهن آرتوران عالمده عزّ و شأن انسانی
 
بیلنمزدی او سرّ عَلَّم الاسمانی تا محشر
 
ازلده اولماسیدی بوالبشر طفل دبستانی
 
قالاردی تا ابد حوّای امکان شب تک آبستن
 
طلوع ایتمزدی گر صبح ازلدن روی رخشانی
 
عجب یوخ نسل زهرا و علیدن بیله بیر فرزند
 
سزادور ایله بحرینین اولا بیر بیله مرجانی
 
فروغ روی پیغمبر نمایاندور جبینیندن
 
شکوه سهم حیدر گزلدوب جَیبینده خفتانی
 
اگر دامانینه جبریل الیله بیر تکان ویرسه
 
توکر بیر آسمان بی شک ملک پاکیزه دامانی
 
حسین سیمای ایمان دور حسین شمع هدایتدور
 
ایدوب روشن جهانی سر بسر نور درخشانی
 
حسین الگوی مردیّ و شرف دور روح آزادی
 
یازوب کوی وفاده قانیله آزادی عنوانی
 
اولوب اُز قانینه غلطان سوسوز عالی مرام اوسته
 
ایدوب زنده قیام حشر اولونجا دین و قرآنی
 
حسین قربانی عشق اولدی «تائب» زنده دور نامی
 
اولا عشّاق عالم بو فدای عشق قربانی
 
شاعر : مرحوم تائب تبریزی
 
************************
 
وداع حضرت امام حسین (علیه السلام)
 
فریاد او وقتیدن که گوروب زینب حزین
 
میدانیدن یارالی امام هدی گلور
 
گل پیکری دولوبدی سراسر یارائیله
 
هر بیر نفس چکور یارالاردان دِما گلور
 
باشی یارالیدور آتاسی مرتضی کیمی
 
آنّیندا داش یاراسی دل مصطفی گلور
 
عرض ایتدی گل باشون یاراسین باغلیوم حسین
 
من تک یاراوی باغلاماقا کیم سزا گلور
 
سن تک بلالی قارداش اولار نه جهانیده
 
من تک نه بیر باجی اولا صاحب وفا گلور
 
آلدی خبر حسین گلوسن بیرده خیمیه
 
ایتدی اشاره باشیله، معناسی لا گلور
 
یعنی آنام باجی منیم اولماز قِییتماقیم
 
امن اولسا آشیانینه مرغ قطا گلور
 
گیتدیم، گوزیوی تیکمه یولا، یول گوزتلمه
 
هیهات بیرده خیمیه بو مبتلا گلور
 
بوردا گورنمه سن گوره سن شهر کوفه ده
 
باشیم اولوبدی زینت نوکِ جدا گلور
 
زینب دیدی حسین آنامین وار سفارشی
 
ایتسن قبول قلبیمه بی حد صفا گلور
 
سویلوب اُپم بوغازیوی آخِر وداعیده
 
اُپسم اله رضایت خیرُ النّسا گلور
 
ویردی جواب قیل آنامین امرینه عمل
 
زهرا رضایتیله رضای خدا گلور
 
اُپدی اجازه سیله حسینین بوغازینی
 
بوردا ظهوره منظره ی غمفزا گلور
 
بو صحنیه باخوردی رقیّه کناریدن
 
گوردی بو آیریلیق گوزه پرماجرا گلور
 
بو حالتیله که باباسی آیریلوب گیدر
 
بیرده چتین خیامه شه کربلا گلور
 
گلدی بلالی عمّه سینون دوتدی دامنین
 
گفتاره عمّه سیله او نازلی بالا گلور
 
عرض ایتدی اُپدون عمّه بابامین بوغازینی
 
چوخ پرملال خاطره بو مایُری گلور
 
سالدون او حالیله که بابامی بیبی یولا
 
بولدوم محال بیرده امام هدی گلور
 
معلوم اولان که بیرده قِییتمز منیم بابام
 
اوندا بلالی باشیمیزه نه بلا گلور
 
باشسیز قالان عیالینه کیم عمّه باش چکر
 
کیملر حمایت ایتماقا اوندانصورا گلور
 
کیم دردیمه یتر، گوزیمون یاشینی سیلر
 
درمان درد ایتماقا الده دوا گلور
 
رافتله کیم چکر منی آغوشه جان کیمی
 
کیم بو شکسته گوگلونی آلماقلیقا گلور
 
الدن گیدور وفالی بابام، کیم بابام کیمی
 
سایه بلالی باشیمون اوسته سالا گلور
 
کیم نازیمی چکر، کیمه ناز ایلرم بویور
 
کیم غم گونونده حالیمه دلدن یانا گلور
 
زینب بویوردی من چکرم نازیوی اوزوم
 
مندن نیازِ ناز اولا سندن سزا گلور
 
سن ناز ایله منده سنون نازیوی چکوم
 
ناز ایتسه نازدانه نه قدری بجا گلور
 
بیکس بابان گیدنده سنی تاپشیروب منه
 
عیناً عمل وصیّتینه جابجا گلور
 
سندن بیر آن گل اوزلی قیزیم گوز گوتورمرم
 
منّتدی جانه هرنه یولوندا بلا گلور
 
قارداش بالاسین عمّه لر عالمده چوخ سویر
 
بو عرض حالیمه بیبی لر آشنا گلور
 
من تک وفالی عمّه اولار نه جهانیده
 
سن تک نه بیر وفالی صفالی بالا گلور
 
من تک نه دل ویرن اولی قارداش بالاسینه
 
سن تک نه عالمه دل آلان دلربا گلور
 
بیله اوزون ایتورمه هله عمّن اُلمیوب
 
غملر سنی تاپاندا بیبون غمزدا گلور
 
زهرا باخیشلی گوزلرون آز دولدوروب بوشات
 
سن آغلینده نای دلیمدن نوا گلور
 
ای مه جبین سنی گوزون اوستونده ساخلارام
 
سنلن ایشیق بو گوزلریمه مه لقا گلور
 
گیتمه گوزومدن آهوی چین و ختای عشق
 
گوز تیرینه نشان ایده اهل خطا گلور
 
سنده بلالیسان بالا منده بلالیم
 
سندن منه صفا، منه سندن وفا گلور
 
کرب و بلا بلاسی یتر باشه، باشیوه
 
شاماتیده وقایع ویرانسرا گلور
 
تائب تدارک ایله محرّم عزاسینی
 
آماده اول عزایه که ماه عزا گلور
 
تائب بو دل لری سنه دل صاحبی ویروب
 
علّت اودور سوزون قلمه چوخ رسا گلور
 
آغلار حسینه صدقیله دنیاده آغلاسان
 
محشر گونی شفاعتیوه مصطفی گلور
 
شاعر : مرحوم تائب
 
*************************
 
زبانحال حضرت امام حسن مجتبی (علیه السلام)
 
ظلمیله مسموم اولموشام ای مظهر زهرا باجی
 
الدن آلوب آرامیمی بو زهر جان فرسا باجی
 
زهر هلاهل ایچدیروب قارداشیوه اهل جفا
 
دور گور نه حاله قالموشام ای کوکب برج وفا
 
یاندیم یاخیلدیم قالمادی عمریم بهارینده صفا
 
من ناله ایلوم، سنده دی گوزیاشلی واویلا باجی
 
زهرایه بنزر گوزلرون دولدورما چوخ دریا کیمی
 
آز قطره قطره گوزیاشون توک لولوءِ لالا کیمی
 
مرضیّه دن سود امّوسن، مرضیّه اول زهرا کیمی
 
ایتسون مبادا صبریوی دست بلا یغما باجی
 
ایلوب مشیّت اقتضا مسموم اولوب دلدن یانام
 
الله یولوندا صبر ایدم هر مشکلی آسان سانام
 
قالمور آنام درده یته، سن هم باجیمسان هم آنام
 
سنسن آنام تک دردیمی آلماقلیقا اولی باجی
 
باخما دولی گوزلی بیله مسموم اولان قارداشیوه
 
ایمدی دایان دور، یتمسون غمله گره خم قاشیوه
 
مندنصورا غم یاغدورار دنیا بلالی باشیوه
 
هر یانه گیتسن سنله وار درد و غم دنیا باجی
 
بیر یاندا گلموش نالیه آغلار یانار اوغلوم حسن
 
بیر یاندا عبدالله اولوب سرگشته پابند محن
 
بیر یاندا حسرتله باخور بو قاسم گل پیرهن
 
مینلرله حسرت یاغدیرور ایتدوقجا هر ایما باجی
 
گاهی قویور دیواره یوز، اشکین عذاره باغلوری
 
گاهی یتیمانه باخور قلب جهانی داغلوری
 
قویمور اوجادان آغلاسون شرمی، صداسیز آغلوری
 
وقریله ایلور عفّتین اثبات او مه سیما باجی
 
آل زینب زهرا شیم بیر آن دیز اوسته باشیمی
 
یغ باشیوه بو صحنه ی غمده سن آل هاشمی
 
آگاه قیل بو حالیدن بیرده حسین قارداشیمی
 
صون دمده یتسون دردیمه اول سرور بطحا باجی
 
یردن گوتورسون نعشیمی مهریله اول جان جهان
 
دوزسون دایانسون دشمنیم گر ایتسه طعن بی امان
 
تابوتیده اعدا منی یتمیش اوخا ایتسه نشان
 
اقدام دعوا ایتمسون صبر دل زهرا باجی
 
بوردا دایانسون داشماسون هرچند خصم ایذاسی وار
 
امّا قاباقدا باشینون طاقت شکن غوغاسی وار
 
طاقت شکن غوغائیله تشکیل عاشوراسی وار
 
تاریخ عاشورا یازار غوغای عاشورا باجی
 
غم لشکری مندنصورا اطرافیوی محصور ایدر
 
بار غم دورِ زمان قدّون بوکر رنجور ایدر
 
جبر فضا امر قضا آخِر وطندن دور ایدر
 
کرب و بلا صحراسینه آخِر چکر اعدا باجی
 
کرب و بلا صحراسینی ازبس دوتار اهل جفا
 
یوز مین قوشون قان قان دیر، امّا حسین بی آشنا
 
سانسیز وورار یاره اونا ظلمیله قوم اشقیا
 
مجروح مرکبدن دوشر شاهنشه بطحا باجی
 
قان ایچره مستولی اولار بسکه اونا سوز عطش
 
سانسیز یارالی جسمیله قاتل لر ایلر کشمکش
 
غلطان اولار اوز قانینه سسلر حسینیم العطش
 
سو ایستیر، یاره وورار شرار بی پروا باجی
 
ظلمیله قوم اشقیا کام دلین ایلر حصول
 
آتدان تراب اوسته دوشر لب تشنه فرزند رسول
 
اول پیکر صد پاره ده آت گزدیرر قوم جهول
 
عیناً همان ساعت اولار محشر سنه برپا باجی
 
بیر عمردور بو پیر اولان ((تائب)) بیزه وابسته دی
 
یکرنگ دور یکروی دور،‌گفتاری بیر سوز اوسته دی
 
امّا جوان داغی اونی جاندان سالوب دلخسته دی
 
صبر ایلسه الله اونا پاداش ایدر اهدا باجی
 
شاعران : مرحومین ذهنی زاده ، صافی ، تائب
 
*****************************
 
زبانحال حضرت امام حسین (علیه السلام)
 
خطاب به حضرت رقیه (سلام الله) در قتلگاه
 
سینه‌مه گٙل گُوزل بالا نازلی رقیّم آغلاما
 
بیله یانوب سیزیلداما نازلی رقیّم آغلاما
 
قید جفایه بسته‌سن؛ اهل جفا اسیری‌سن
 
غصّه‌یوروبدی‌خسته‌سن؛دردوبلا اسیری‌سن
 
ظلمیله دلشکسته‌سن؛ کرب‌وبلا اسیری‌سن
 
باخما بو نوع صاق صولا؛نازلی رقیّم آغلاما
 
گرچه چتیندی بلبله؛ صحن چمندن آیریلا
 
ترک ائده گُل بوداقینی؛سرووسمندن‌آیریلا
 
یعنی‌سنون کیمین بالا؛جبریله مندن‌آیریلا
 
لیک نه چاره وار بالا ؛ نازلی رقیّم آغلاما
 
سؤگولوم عادت ائتموسن؛دائماً اعتناقیمه
 
لیک‌بوگُون جفائیله؛توش اولوسان‌فراقیمه
 
سینه‌مه سال‌اُوزون‌آلوم؛بیرده‌سنی‌قوجاقیمه
 
ایلمه نی کیمی نوا ؛ نازلی رقیّم آغلاما
 
غصّه‌لی‌سن زبس دولوب؛ابربهارتک گوزون
 
چوخ سنی انجیدوبدیلر؛واردی‌ئورکده‌چوخ سوزون
 
گتمه‌لیسن علاجسیز؛سینه‌مه بیرده سال اوزون
 
دردیوی دی ائدیم دوا ؛ نازلی رقیّم آغلاما
 
من شه مشرقینیدیم؛ظلمیله قانه باتموشام
 
ئولدوروب‌اوز رعیّتیم؛عالمی گوزدن آتموشام
 
پیکر چاکچاکیله؛قانلو قوم اوسته یاتموشام
 
سینه یارا بدن یارا ؛ نازلی رقیّم آغلاما
 
ایله‌بیان‌گوروم ندن؛سن بئله‌حاله قالموسان
 
خرداجا سنّیله دله؛بیر بئله غصه سالموسان
 
ای گل ناز گلشنیم ؛ بیله ندن سارالموسان
 
رنگون اولوبدی کهربا ؛ نازلی رقیّم آغلاما
 
سن بالا‌ سینه داغلوسان؛سولموش اوزون نشان ویرور
 
داغلی دلون یانور گوزون؛جامی عذاره قان وئرر
 
غملریوی بو گوز یاشون؛سولموش اوزونده سان ئرور
 
نسکلوه جهان فدا ؛ نازلی رقیّم آغلاما
 
من بولورم رقیّه جان؛سن نه‌قدر وفالیسان
 
من کیمی سینه داغلیسان؛سنده ئورک یارالیسان
 
منده باشی بلالیم ؛ سنده باشی بلالیسان
 
دُز دی بلالره بلی ؛ نازلی رقیّم آغلاما
 
شاعر : مرحوم تائب
 
*****************************
 
در احوالات حضرت امام جواد (علیه السلام) 
 
جواد آل پیغمبر اولوب مسموم جان وئردی
 
حسینین سو دیوب جان وئرماقین عینا نشان وئردی
 
(اولوب مسموم جان وئردی)
 
ز بس غم وئردی یوز چکدی همیشه ناله جانکاه
 
محاقه مایل اولدی چرخ عزتده اولان بیر ماه
 
چکوب طول مصائب رشته عمرین ایدوب کوتاه
 
جوان وقتینده جان اول شهریار انس و جان وئردی
 
ایرمی بش ایل عمرین ایلیوب اهل خبر مرقوم
 
بو آز عمریله اولدی اول شه دین لیک چوخ مظلوم
 
ایدوبلر عاقبت غربت ولایتده اونی مسموم
 
یانوب دلدن اونا هر لحظه یوز سوز نهان وئردی
 
خزانه تا بهارین صرصر بیدادی دوندردی
 
قضا گلچینی باغ عمرینین عشرت گلین دردی
 
سارالدی گلشن دینین عطشدن نو گل وردی
 
اونون باده صفاسین آفت باد خزان وئردی
 
اولان ئوز عهدینه عشق عالمینده بند و وابسته
 
چکردی انتظارین اوغلونون جان اوسته دلخسته
 
سو جامی الده حاضر اولدی ئوز اوغلی باشی اوسته
 
آتائیله بالا دل دردینه شرح و بیان وئردی
 
آتادان گلدی آخر دم اوغول جویای حال اولدی
 
آتا گوردی جوانین سینه دن زایل ملال اولدی
 
حسینی جان وئرنده درک ایدن اما هلال اولدی
 
اورکدن اودلانوب احوالینه نی تک فغان وئردی
 
گوروب بیر زخمدار آهو کیمی دوشموش او دلخسته
 
چالور قان ایچره دست و پا , وورالار زخمی زخم اوسته
 
باخور حسرتله سویلور العطش آهسته آهسته
 
هلالین قلبینه رقّت بو اندوه گران وئردی
 
خیال ائتدی ئوزینه حق یولوندا آبرو وئرسین
 
گل مقصود زهرایه او چولده رنگ و بو وئرسین
 
او یالقیز بی کس و لب تشنیه جان اوسته سو وئرسین
 
نشان ئوز همتین گزلین مرام اوسته عیان وئردی
 
گیدوب سو گتدی سیراب ایلسین اول شاه عطشانی
 
گلنده گوردی یولدا شمر شوم و نامسلمانی
 
گوزی یاشلی , الینده قانلی خنجردن آخار قانی
 
دیدی گیتمه حسینه خنجریم آب روان وئردی
 
دیدی یوخسا بساط ظلم و کینه قورموسان ظالم
 
حسینی ئولدوروب زهرا گلین سولدورموسان ظالم
 
ندن بس اشگویله گوزلرین دولدورموسان ظالم
 
دوباره دانه اشکین توکوب رخساره سان وئردی
 
دیدی قان ائتمیشم دوزدور بو چولده قلب زهرانی
 
بو گون رحم ائتمیوب ئولدورمیشم معنای قرآنی
 
ولی بو ناله و فریادیمین وار اوزگه عنوانی
 
دولاندی قانیله دولموش چوخور بیر یر نشان وئردی
 
باخوب گوردی او یرده بیر اوجا قامت خانم عورت
 
دوتوبدور خیرداجا بیر قیز الیندن سینه ده حسرت
 
وورور باشسیز جنازه باشینه دوره او خوش فطرت
 
دیور قارداش سنون تک هانسی بیر مظلوم جان وئردی
 
باجون اولسون اورکده قالدی چوخ گزلین سوزون قارداش
 
دلینده العطش باخدی سویا حسرت گوزون قارداش
 
آتان ساقی کوثر, تشنه جان وئردون ئوزون قاراش
 
سنه قان سو یرینه تیغ تیز جانستان وئردی
 
عزادار حسین "فکری" ائدوب ترغیب اولوب بانی
 
چکوبدور نظمه "تائب" بو قضایای غم افزانی
 
نصیب ائت قبرینی یا رب دیاق اوردا بو عنوانی
 
جواد آل پیغمبر اولوب مسموم جان وئردی
 
شاعر : مرحوم تائب
 
********************
 
ورود به ماه محرم و گریز به احوالات وداع
 
هر سمتیدن قولاقه حسینی نوا گلور
 
سینموش اورکلره بو نوادن صفا گلور
 
گویا محرّم آخشامیدور، کوی و برزنه
 
قاره چکوبله عالمه حال عزا گلور
 
اهل عزا باتوبلا محرّم قراسینه
 
پیر و جوان گیوبدی لباس قرا گلور
 
ایلوب حسین ترک وطن چوللری گزر
 
کرب و بلایه پادشه کربلا گلور
 
ناقص قویوبدی حجّینی بیت الحرامیده
 
کوی وفاده ایتماقا سعی و صفا گلور
 
شوریده سردی باغلیوب احرام کربلا
 
دشت بلانی ایتماقا رشک منا گلور
 
قربان کسنمیوبدی، منای محبّته
 
جمع ایلیوبدی باشینه یتمیش فدا گلور
 
چشم بصیرت ایستوری گورسون او عالمی
 
بولسون که بیت صاحبی هاردان هارا گلور
 
بیت و حرمدن آیری دوشوب کربلاسینه
 
شوریله مُحرم حرم کبریا گلور
 
بیر قافله اونیله دوشوب طیّ راه ایدر
 
آردینجا غیبیدن بو صدا بو ندا گلور
 
بو کاروان دالینجا دوشوب کاروان مرگ
 
هر یان او جمعیله دولانور پا به پا گلور
 
روح امان خلق امانگاهی ترک ایدوب
 
وحشت زده، امانسیز، امینُ الوَری گلور
 
بعضی گورور امامی او حالیله درک ایدور
 
زنگ خطر صداسی اونا برملا گلور
 
بی راهه یول دوتوب یولونی ایلوری عوض
 
درک ایلمور امامی، که باشه بلا گلور
 
هر کیمسه دوشسه مشکله دنیاده رسمیدور
 
اوندان قاچالّا، درکینه حال اِبا گلور
 
مسلم شهادتین ایشیدوب بین راهیده
 
اولموش عزالی، اگنینه گیموش قرا گلور
 
عاشور شور اولاندا چخاردار او قاره نی
 
اوندا حسینین اگنینه قانلی رَدا گلور
 
مسلم شهادتی اونا مطلق بیان ایدور
 
کلک قدر یازوب باشینا نه قضا گلور
 
بوندان بیله تمام بنین و بناتیله
 
سلطان عشق پادشه کربلا گلور
 
هردم گوزل گوزیله باخور رهگذاریده
 
بیگانه نی ایدور اوزینه آشنا گلور
 
قربان اولوم او گوزلره که بیر نگاهیله
 
ایلور مسیحی اوغلونی اهل ولا گلور
 
گویا سراغ آلوب یخلان قتلگاهینی
 
دشت عراقه سالماقا شور و نوا گلور
 
قارداش بالاسی، قارداش اوغول باشدا، کعبه ی
 
اهل وفایه خامس آل عبا گلور
 
مظلوم عمو یانینجا اُله قان حنا یاخا
 
دوشموش نشانه ی حسن مجتبی گلور
 
مجنون عشق ایدوب چوله لیلانی سالماقا
 
مظلوم آتِیله اکبر گلگون قبا گلور
 
عبّاس نامدار علمدار کربلا
 
آچموش امام باشینون اوسته لوا گلور
 
سقّادی تشنه قیزلارا سقّالیق ایتماقا
 
مشکین سالوبدی چیگنینه دلده صفا گلور
 
بیر شیرخواره غنچه لبی غنچه گل کیمی
 
گل سینه سی ایدوب اوزینه بیر آنا گلور
 
هردم دولاندیرور بالا آهو باخیش گوزین
 
جوشه آنا دلینده کی مهر و وفا گلور
 
ایگلور اُپور، او غنچه گله لایلای دیور
 
لایلای دینده داغ داش اونا همصدا گلور
 
اصغر دیولّر آدینا اکبردی شانیده
 
نازیله بی نیازینه اولسون فدا گلور
 
شش ماهه لیقدا ایستوری سوددن آچیلماقین
 
دلده او شوق باشدا او شور و هوا گلور
 
اوخ دایه سی گوزتلوری سوددن اونی آچا
 
تاپسون او دایه نی او گل اوزلی بالا گلور
 
سجّاد عابدین که اولوبدور مریض عشق
 
آلسون شِفا اوزینه او روح شِفا گلور
 
بازار شامی سیر ایده قولّاردا سلسله
 
زین العباد سلسله ی اوصیا گلور
 
دین دردی واردی، نسخه ی درمان الینده دور
 
بازار شامیدن آلا قطعی دوا گلور
 
شام جفایه تاپمادی یول مرتضی علی
 
شامه نیابتاً گیده اول مقتدا گلور
 
مدّاحِ مرتضادی گیده شامیده دیه
 
سفیانیانه منقبتِ مرتضی، گلور
 
زینبده آیریلانماز عیاندور حسینیدن
 
بیر روح ایکی بدنده او اخت و اخا گلور
 
چون یاخشی یاره باغلاماقین مشقین ایلیوب
 
کوی بلاده باغلاماقا چوخ یارا گلور
 
نازلی رقیّه عمّه سینون دامنین دوتوب
 
اولسون اوز عمّه سیله اسیر بلا گلور
 
بیر شورش قیامتی وار شهر شامیده
 
کرب و بلاسی بو خبره مبتدا گلور
 
اودلار جهانی خوردا اوشاق وااَبا دیسه
 
کرب و بلا چولینده دیه وااَبا گلور
 
ویرانه ده یاتا اویادا یاتموش عالمی
 
واردور آییق او قلبیده بو مدّعا گلور
 
فریاد او وقتیدن که گوروب زینب حزین
 
میدانیدن یارالی امام هدی گلور
 
گل پیکری دولوبدی سراسر یارائیله
 
هر بیر نفس چکور یارالاردان دِما گلور
 
باشی یارالیدور آتاسی مرتضی کیمی
 
آنّیندا داش یاراسی دل مصطفی گلور
 
عرض ایتدی گل باشون یاراسین باغلیوم حسین
 
من تک یاراوی باغلاماقا کیم سزا گلور
 
سن تک بلالی قارداش اولار نه جهانیده
 
من تک نه بیر باجی اولا صاحب وفا گلور
 
آلدی خبر حسین گلوسن بیرده خیمیه
 
ایتدی اشاره باشیله، معناسی لا گلور
 
یعنی آنام باجی منیم اولماز قِییتماقیم
 
امن اولسا آشیانینه مرغ قطا گلور
 
گیتدیم، گوزیوی تیکمه یولا، یول گوزتلمه
 
هیهات بیرده خیمیه بو مبتلا گلور
 
بوردا گورنمه سن گوره سن شهر کوفه ده
 
باشیم اولوبدی زینت نوکِ جدا گلور
 
زینب دیدی حسین آنامین وار سفارشی
 
ایتسن قبول قلبیمه بی حد صفا گلور
 
سویلوب اُپم بوغازیوی آخِر وداعیده
 
اُپسم اله رضایت خیرُ النّسا گلور
 
ویردی جواب قیل آنامین امرینه عمل
 
زهرا رضایتیله رضای خدا گلور
 
اُپدی اجازه سیله حسینین بوغازینی
 
بوردا ظهوره منظره ی غمفزا گلور
 
بو صحنیه باخوردی رقیّه کناریدن
 
گوردی بو آیریلیق گوزه پرماجرا گلور
 
بو حالتیله که باباسی آیریلوب گیدر
 
بیرده چتین خیامه شه کربلا گلور
 
گلدی بلالی عمّه سینون دوتدی دامنین
 
گفتاره عمّه سیله او نازلی بالا گلور
 
عرض ایتدی اُپدون عمّه بابامین بوغازینی
 
چوخ پرملال خاطره بو مایُری گلور
 
سالدون او حالیله که بابامی بیبی یولا
 
بولدوم محال بیرده امام هدی گلور
 
معلوم اولان که بیرده قِییتمز منیم بابام
 
اوندا بلالی باشیمیزه نه بلا گلور
 
باشسیز قالان عیالینه کیم عمّه باش چکر
 
کیملر حمایت ایتماقا اوندانصورا گلور
 
کیم دردیمه یتر، گوزیمون یاشینی سیلر
 
درمان درد ایتماقا الده دوا گلور
 
رافتله کیم چکر منی آغوشه جان کیمی
 
کیم بو شکسته گوگلونی آلماقلیقا گلور
 
الدن گیدور وفالی بابام، کیم بابام کیمی
 
سایه بلالی باشیمون اوسته سالا گلور
 
کیم نازیمی چکر، کیمه ناز ایلرم بویور
 
کیم غم گونونده حالیمه دلدن یانا گلور
 
زینب بویوردی من چکرم نازیوی اوزوم
 
مندن نیازِ ناز اولا سندن سزا گلور
 
سن ناز ایله منده سنون نازیوی چکوم
 
ناز ایتسه نازدانه نه قدری بجا گلور
 
بیکس بابان گیدنده سنی تاپشیروب منه
 
عیناً عمل وصیّتینه جابجا گلور
 
سندن بیر آن گل اوزلی قیزیم گوز گوتورمرم
 
منّتدی جانه هرنه یولوندا بلا گلور
 
قارداش بالاسین عمّه لر عالمده چوخ سویر
 
بو عرض حالیمه بیبی لر آشنا گلور
 
من تک وفالی عمّه اولار نه جهانیده
 
سن تک نه بیر وفالی صفالی بالا گلور
 
من تک نه دل ویرن اولی قارداش بالاسینه
 
سن تک نه عالمه دل آلان دلربا گلور
 
بیله اوزون ایتورمه هله عمّن اُلمیوب
 
غملر سنی تاپاندا بیبون غمزدا گلور
 
زهرا باخیشلی گوزلرون آز دولدوروب بوشات
 
سن آغلینده نای دلیمدن نوا گلور
 
ای مه جبین سنی گوزون اوستونده ساخلارام
 
سنلن ایشیق بو گوزلریمه مه لقا گلور
 
گیتمه گوزومدن آهوی چین و ختای عشق
 
گوز تیرینه نشان ایده اهل خطا گلور
 
سنده بلالیسان بالا منده بلالیم
 
سندن منه صفا، منه سندن وفا گلور
 
کرب و بلا بلاسی یتر باشه، باشیوه
 
شاماتیده وقایع ویرانسرا گلور
 
تائب تدارک ایله محرّم عزاسینی
 
آماده اول عزایه که ماه عزا گلور
 
(تائب) بو دل لری سنه دل صاحبی ویروب
 
علّت اودور سوزون قلمه چوخ رسا گلور
 
آغلار حسینه صدقیله دنیاده آغلاسان
 
محشر گونی شفاعتیوه مصطفی گلور
 
شاعر : مرحوم تائب
 
************************
 
شهادت حضرت امام جعفر صادق (علیه السلام)
 
ای جعفری مذهبلرین آرام جانی
 
گیتدون عزادار ایلدون اهل ولانی
 
واگیر ::
 
ای صادق آل عبا
 
اولسون سنه جانلار فدا
 
ای وای آقام وای
 
ای دللره داغلار قویان ای وای آقام وای
 
امید ائوین باغلار قویان ای وای آقام وای
 
ای شیعه نی اغلار قویان ای وای آقام وای
 
ای ایلین ماتم زده پیر و جوانی
 
ای سینه سی گنجینۀ علم الهی
 
ای محضر درسی اولان دین پایگاهی
 
ای سایۀ قدسی اولان حق شاهراهی
 
مذهبده روشن ایلین اهل ولانی
 
جسم بیانه ای ئوزی بیر روح ناطق
 
ای خالق فضل و ادب مخلوق خالق
 
تعلیم ائدن ای اهل صدقه فقهِ صادق
 
ای اوستاد مکتب علم و معانی
 
گمراه ایدوبدی امتی باطل یازنلار
 
حق علمینی مدفون ایدوب مدفن قازانلار
 
تاپمازدی یول سن اولماسیدون یول آزانلار
 
فقهیله آگاه ایلدون کلّ جهانی
 
سن آچماسیدون مکتب درس و دیانت
 
سن سالماسیدون عالمه نور فقاهت
 
تاریک اولاردی عالم دین و شریعت
 
سن زنده ائتدون شرع حکم مصطفانی
 
سن فقهیله دانانی جاهلدن آیردون
 
سن علمیله نادانی عاقلدن آیردون
 
چکدون ریاضت حقی باطلدن آیردون
 
واردور سنون فقهونده روح جاودانی
 
مولا سنون اسلامیده چوخ خدمتون وار
 
هر بیر پریشان جمعده جمعیتون وار
 
اهل تشیُّع گردنینده منتون وار
 
سنسن سرافراز ایلین بو شیعیانی
 
سن حکم شرع ذات بیچونی دیریتدون
 
عاشورده ناحق آخان قانی دیریتدون
 
قاندان حسین یازمیش او قانونی دیریتدون
 
دوتدون مرام شهسوار کربلانی
 
آچدون سن اسلام اهلینه راه سعادت
 
منصور جانی ائتدی بو امره حسادت
 
آری اولار گمراه اولان لاردا بو عادت
 
قصد ائتدی خاموش ایلسون نور خدائی
 
ائتمیشدی بسکه سست اونی جام غروری
 
حقی گورنده خیره اولدی چشم کوری
 
حقّونده آرتوردی سنون هر ظلم و زوری
 
ظلمینده چخدی حددن اول خصم جانی
 
باخموب که سن دلبند پاک مصطفاسن
 
باخموب که سن فرزند شاه لافتاسن
 
باخموب که سن صبر دل خیرالنساسن
 
بُلدی روا حقونده هر جور و جفانی
 
باخموب که سن چشم چراغ ماسواسن
 
باخموب که سن بیر یادگار مجتباسن
 
باخموب که نور چشم شاه کربلاسن
 
گتدی بلالی باشیوه هر بیر بلانی
 
ئوز کینه سین زهرایه معلوم ائتدی آخر
 
سن تک امید خلقی مظلوم ائتدی آخر
 
انگور مسمومیله مسموم ائتدی اخر
 
سندن او زهر آلدی داخی تاب و توانی
 
آچدون گوزون باخدون دوشنده احتضاره
 
گوردون بالان موسا آلوب باشون کناره
 
جدون حسین اما دوشنده پاره پاره
 
گوردی باش اوسته زینب بی خانمانی
 
فرمایش ائتدی ای منه جانانه زینب
 
شمع وفایه ای اولان پروانه زینب
 
بوردا دایانما بوردا وار بیگانه زینب
 
گئت خیمه گاهه باشه یغ آل عبانی
 
ال آچسا ظلمه آل فرزند سمیه
 
قویما وورا قزلاریمی آل امیه
 
قویما خصوصاً آغلاسون نازلی رقیه
 
چوخ ایسترم اول دختر شیرین زبانی
 
بیر کوچه مشگی نوحه خوان ائتدی تقاضا
 
شوقیله تائب ائتدی بیله نوحه انشا
 
امیدوار روز جزا خاتونی زهرا
 
اوتدان قوتارسون شاعریله نوحه خوانی
 
شاعر : مرحوم تائب
 
************************
 
 تسلیت حضرت  امام حسن مجتبی (علیه السّلام)
 
در عزای پدر به حضرت امام حسین (علیه السّلام)
 
دور آتام هجرینده ایتمه ذکر واویلا حسینیم
 
توکمه گوز یاشین سرور سینۀ زهرا حسینیم
 
قویما بوینون چیگنوه چوخ اشگون آز رخساره باغلا
 
آه آتشبار چکمه قلبون آز حسرتله داغلا
 
گوزلرون قربانی قارداش اُز اُزون یورما آز آغلا
 
عرش اعلایه اوجاتما بانگ واویلا حسینیم
 
قان اولار دل لر بلالی سن بیله دل داغلینده
 
حسرتیله گل جماله اشگ حسرت باغلینده
 
عالم آغلار یر گوی آغلار سس چکوب سن آغلینده
 
ایتمه ناله ای حبیب خالق یکتا حسینیم
 
غم دوتار کلّ جهانی سن حسین غمگین اولاندا
 
اشگیله گوزلر دولالّار گوزلرون اشگه دولاندا
 
سر بسر گل لر سولا للار عارضون گل تک سولاندا
 
سولما زهرا گلشنینده ای گل زیبا حسینیم
 
چوخ اورکلنمه بو قدری باشینه اشگون بوراخما
 
اللرون قوینوندا بیله صاق صولا حسرتله باخما
 
گوزلرون دولدورما باخما قارداشون یاندیرما یاخما
 
اودلی قلبونده یاراتما آه آتش بار حسینیم
 
پیکر مهر و وفایه سن حسین روح روانسان
 
نور ایمان روح قرآن اصل دین جان جهانسان
 
جوهر جان سان عزیزیم سیّد اهل جنانسان
 
احترامون ساخلار اهل عالم بالا حسینیم
 
سن منیم صبر دلیمسن هم آنام زهرا عزیزی
 
هم آتام آرام جانی هم بابام طاها عزیزی
 
هم حبیب لم یزلسن خالق یکتا عزیزی
 
آغلاما پوزما وقارون عزّته دارا حسینیم
 
سن روان عاطفتسن هیکل مهر و وفاسن
 
ین اوسان اسمون دوادی ذکر اولان دلده شفاسن
 
خامس آل عباسن شهسوار کربلاسن
 
هر بلا گَلسه بلا - دی لا دیمه اصلا حسینیم
 
اود دوتوب قلبون دولوبدور قانیله بیللم لبالب
 
آغلاما بیر بیله امّا توکمه گوز یاشین مرتّب
 
سن بیله بی صبر اولاندا نیلسون مظلومه زینب
 
گورموسن آغلار اوغونماز دختر زهرا حسینیم
 
آغلاما صبر ایت بلالی باشوین غوغاسی واردی
 
کربلاده ماجرای یوم عاشوراسی واردی
 
زینبین اوردا همان گون محشر کبراسی واردی
 
ای قتیل تشنه کام یوم عاشورا حسینیم
 
ایله بیر گوندور که زهرا وای بالام وای باشلار آغلار
 
رنگی سولموش قزلار آغلار باجیلار قارداشلار آغلار
 
یرلر آغلار گویلر آغلار داغلار آغلار داشلار آغلار
 
سسلنر وای قارداشیم وای زینب کبری حسینیم
 
دین یولوندا باش ویرنلر دینینه قربان اولالار
 
تشنه لبلر،سود امرلر،پیرلر نورس جوانلار
 
مردلر گل پیکریندن سوکیمی آخدیقجا قانلار
 
کربلا صحراسین ایلر قانلی بیر دریا حسینیم
 
«تائبا» سن دوت بقانی بو جهان دار فنادی
 
بو فنا دنیا مقام امتحان ماسوادی
 
هر گون عاشورادی هر یر کربلای پر بلادی
 
اهل عاشورا اولوب - دی ای گوزل مولا حسینیم
 
شاعر : مرحوم تائب تبریزی
 
*********************
 
کوچ از خرابه شام
 
قرا گینلری باشه یغوب باشندا قرا
 
بلالی زینب ائدوب عزم کوی جانانه
 
اولار که ورموشیدی اهل بیته دل یاراسی
 
اشیتدیلر وئریلور کوچ آل عمرانه
 
قرا لباس گیوب گلدیلر مشایعته
 
حضور زینبه دل آچدیلار ذلیلانه
 
دیریدولر بیزی زهرا قیزی گذشت ایله
 
یزیدون ایلسون الله ائوینی ویرانه
 
سیزی بیر اوزگه آدیله بیزه تانتدوردی
 
فریب وئردی بیزی سالدی بیله خسرانه
 
بوسوزلری ائشیدوب فاطمه قیزی زینب
 
دوباره قلبی یانوب دوندی گوز یاشی قانه
 
دولی گوزیله باخوب شامیانه دل بیتاب
 
یانایانا ایلدی اهل شامه بیله خطاب
 
بوشامیدن گئدروخ شامیان ائویز آباد
 
بو یردن آیریلوروخ باغریقان ائویز آباد
 
بو سیز بو شام سیه روی بیز خداحافظ
 
گونوز قرا اولا سفیایانیان ائویز آباد
 
پیمبر عترتینه یاخشی ایلدوز حرمت
 
عجیبه عاطفه وئردوز نشان ائویز آباد
 
اسیر ائدوب قولی باغلی بیزی قوناق گئتدوز
 
قوناقه اولدوزعجب میزبان ائویز آباد
 
بیزه شماتتیله دل یاراسی چوخ وئردوز
 
گلوب یولا سالسوز باغریقان ائویز آباد
 
گچنده کوچه لروزدن بیز داشا باسدوز
 
نهانی کینه زی ائتدوز عیان ائویز آباد
 
بلالی باشیمیزه بام لردن اوت یاغدی
 
اولوب سیزون الوز آتشفشان ائویز آباد
 
همای اوج شرف عایدون ایچون وئردوز
 
حضیض فقرده سیز آشیان ائویز آباد
 
پیمبر اوغلونا سیز خارجی آدی قویدوز
 
خدنگ تهمته ائتدوز نشان ائویز آباد
 
بیز آغلادوخ بیزه سیز گولدوز ائتدوز استهزا
 
او گولماقیز بیزه گلدی گران ائویز آباد
 
اوتانمادوز آجی دلّلریله سیز وردوز
 
یارالی دل لره زخم زبان ائویز آباد
 
بو قافله دئمدوز مصطفا عزیزیدیلر
 
بیزه خرابه ده وئر دوز مکان ائویز آباد
 
بیر اوچ یاشیندا قیزی بوردا غصّه مرگ ائله دوز
 
خرابه یرده بالام وئردی جان ائویز آباد
 
مدینه یوسفینین قانلی کوینگون وئردوز
 
مدینیه آپارام ارمغان ائویز آباد
 
بو شهریدن گئدیروخ بیر سفارشیم واردی
 
اونی قبول ایلیون شامیان ائویز آباد
 
منیم خرابه ده بیر نازلی سوگلیم قالوری
 
چخاتمیون بیز یاددان بیر آن ائویز آباد.
 
قطار عشق گئدور لیک او قیز قالور یالقیز
 
وئرون خرابیه باش هر زمان ائویز آباد
 
بو شهریده بو قیزون ئیل قبیله سی یوخدی
 
اولون بو ائلسیزه سیز مهربان ائویز آباد
 
محبّت اوسته اولوبدور محبّت عاشقی دور
 
ائدون محبت اولون دلستان ائویز آباد
 
گئدور بو قافله یوخ قبری اوسته آغلیانی
 
توکون مزارینه اشگ روان ائویز آباد
 
سنقدی قلبی سیز الله دان اوتری گوگلون آلون
 
جزا وئره سیزه حق بی گمان ائویز آباد
 
گوزل مزارینین اوستونده شمع روشن ائدون
 
سپون گلاب اولون عنبر فشان ائویز آباد
 
نه دردوز اولسا اولار بو قیزون الیله دوا
 
گلون زیارته پیر و جوان ائویز آباد
 
بو اوچ یاشیندا حسین نوحه خوانینه تائب
 
اولون حقیقتیله نوحه خوان ائویز آباد
 
شاعر : مرحوم تائب
 
*******************
 
احوالات راه شام
 
او گوزل گوزیله بیر باخ بیزه گاه گاه قارداش
 
که سنق دله صفادور او گوزل نگاه قارداش
 
بو بلالی کاروانین گوگل اضطرابی چوخدور
 
هاموسی شکسته دلدور اورک التهابی چوخدور
 
بو سنق اورکلری آل، بولوسن ثوابی چوخدور
 
که اولار سنق اورکده یارادان اله قارداش
 
گور اسیر ایدوبدی دشمن نجه آل بوترابی
 
اُپوری نجه یدا... الینی جفا طنابی
 
قولی باغلی خسته دلده یوخودی قرار و تابی
 
بالاوی سالوب ایاقدان ستم سپاه قارداش
 
او شکسته دلدی لطف ایت او سنق دله صاف ویر
 
هامی اهل کائناته خط شیوه ی وفا ویر
 
اونا باخ محبّتیله او مریضیوه شِفا ویر
 
که مرض توان و تابین ایلیوب تباه قارداش
 
بیزه رافتون آزالموش سنون ای روان رافت
 
او گوزل گوزیله گه گه باخوب ایتموسن محبّت
 
گوزیمون و یا کسوبدور قاباقین سرشک حسرت
 
گوره بولمورم جمالون واریم اشتباه قارداش
 
او وفا که شرحی چوخدور او وفا کتابی سنسن
 
فلک محبّتین هم ایشیق آفتابی سنسن
 
دل شبده کاروانین همی ماهتابی سنسن
 
باشیم اوسته گون گونوزده، گجه وقتی ماه قارداش
 
بیله روبهان شامی سانوری که دستگیرم
 
بونی بولموری که شیرِ حق آتامدی، منده شیرم
 
منی کس اسیر ایدنمز سنون عشقیوه اسیرم
 
آپارار منی هایاندا قورا خیمه گاه قارداش
 
بولورم محبّت اهلی یارالی دوشر بلایه
 
او دوزر محبّت اوسته هامی رنج و ابتلایه
 
دوزرم سنون یولوندا اودی منده هر بلایه
 
اولی کوه کوه غملر نظریمده کاه قارداش
 
من او عاشقم که واردور سنون عشقیوه نیازیم
 
سن او روح عشقسن که سنه عشقیدور ملازم
 
بو جهان محبّت اولسا آدون اولماسا نه لازم
 
که وفا و مهر سنسیز اولی روسیاه قارداش
 
ره عشقیده دایانّام غم اگرچه ایللر اولسون
 
یورولوب دایانمارام من یول اگر اوزاق تر اولسون
 
بیله شرطیله که باشون بو یول اوسته رهبر اولسون
 
منه خوش گلر نه قدری اولا رنج راه قارداش
 
ندی عالم محبّت او اودیله یانماسام من
 
ندی معنی محبّت غمی سهل سانماسام من
 
قولی باغلی گر دالنجا باشیوین دولانماسام من
 
یازولار وفا خطینده آدیما گناه قارداش
 
منی ترک ایدوب گیدندن داخی قیدیمه قالان یوخ
 
منی سن سالالی گوزدن داخی یادینه سالان یوخ
 
غمیله دولوبدی قلبیم، غم و دردیمی آلان یوخ
 
اودی چاره سیز آپارّام غمیمه پناه قارداش
 
فلکه نوا گیدنده او نوالی نینوادن
 
خیم اود دوتوب یاناندا او گون آتش جفادن
 
آلوب اود یانان اورکلر او لهیبِ کربلادن
 
اودی اود توکور چکنده بالا قیزلار آه قارداش
 
او وفالیسان وفانین اوزی سنده دور یارالی
 
او صفالیسان صفانین سوزی سنده دور یارالی
 
بو وفالی کاروانین گوزی سنده دور یاارلی
 
گوزیوی گوتورمه احسان ایله گاه گاه قارداش
 
او وفالیم وفانین یولون ای وفالی بولّم
 
دیمه من بو لوح دلدن رقم وفالی سیلّم
 
دوشرم باشون دالنجا گیده هر دیاره گلّم
 
اولونا ولو خرابه منه خوابگاه قارداش
 
بو دوگولماقی ویروبدور منه درس ازلده زهرا
 
ره دینیده دوگولماق منه چوخ گلور گوارا
 
بیله ادّعایه اثبات اوز الیمده وار مهیّا
 
بو کبود پیکریمدور سوزیمه گواه قارداش
 
سنه فخردور مرامون، سنه فخردور شهادت
 
بو عظیم نهضتونده منه فخردور اسارت
 
منه بسدی بیله عزّت، سنه بسدی بو جلالت
 
تاپوب هانسی باجی قارداش بیله عزّ و جاه قارداش
 
او گوزل محاسنوندن گذر صبا دوشنده
 
گوتورور اوزیله باهم گوزل عطریوی گیدنده
 
سپر عنبر حسینی هامی دشت و هر دمنده
 
آلوری او عطریدن جان هامی گل گیاه قارداش
 
سوزی «تائبا» یازاندا یازاسان حقیقتیله
 
اوز آقان باخار یقیناً سنه چوخ عنایتیله
 
گینه یاز، بیله بویورموش خانمیم فصاحتیله
 
او گوزل گوزیله بیر باخ بیزه گاه گاه قارداش
 
شاعر : مرحوم تائب
 
***********************
 
احوالات کوفه
 
اهل کوفه اهل دین دینینده غفلت ایلمز
 
حقّی دانماز، حکم قرآنه خیانت ایلمز
 
اهل دین چخماز امور دینیده اندازه دن
 
پیکر مجروح دینه یاره وورماز تازه دن
 
اهل قرآن اهل قرآنی ایدوب شیرازه دن
 
دم ووروب قرآنیدن هر یرده صحبت ایلمز
 
سو یانندا اهل دین یخماز مسلمانی سوسوز
 
ایلمز خاموش مطلق نور ایمانی سوسوز
 
سو یانیندا اُلدوروب معنای قرآنی سوسوز
 
دینی ساتماز خیمه ی قرآنی غارت ایلمز
 
اهل دین اعراض ایدر اشرار بدفرجامیدن
 
مطلقاً ایلر برائت لفظ استسلامیدن
 
اهل قرآن یوز چویورمز صاحب اسلامیدن
 
دشمنی قرآنه عالمده حمایت ایلمز
 
اهل دین پابند اولار اسلام حدّ و حصرینه
 
وقف ایدر اعمالیله جانین امامین نصرینه
 
اهل قرآن ایلمز طغیان امام عصرینه
 
عترتین وابسته ی قید اسارت ایلمز
 
اهل کوفه سیز داخی کفروزده طغیان ایتمیسوز
 
دانمیسوز اوز دینوزی انکار قرآن ایتمیسوز
 
تشنه لب پیغمبر اوغلون قانه غلطان ایتمیسوز
 
ایتمیسوز بیر ظلم که هیچ بیر جماعت ایلمز
 
اهل دین آلماز قولاقه غیر قرآن قال و قیل
 
سالماز عرش اعظمه قتل امامیله عویل
 
ظلم الیله ایلیوب پیغمبرین اوغلون قتیل
 
اهل بیتین وحشته سالماز جسارت ایلمز
 
ادّعای دین ایدن ویرمز مسلمانه فشار
 
دینه بیگانه اولوب ایتمز اوزون اغیاره یار
 
اوز امامین ایلیوب اوز خانمانیندن کنار
 
چوللره سالماز، دچار رنج و زحمت ایلمز
 
تابع قرآن اولان دینین بولر، آزماز سوزون
 
وقف ایدر احیای دین اوسته گِجِیله گوندوزون
 
اهل قرآن حکم قرآنه بولر محکوم اوزون
 
اوزگه بیر فرمانه تن ویرمز اطاعت ایلمز
 
سیز اولارسوز پیکر اسلامه اوخ چوخ وورموسوز
 
نه بیر اوخ، نه اون، نه یوز، حدّیندن آرتوخ وورموسوز
 
سودامر حلقیندن اوچ شعبه سولی اوخ وورموسوز
 
کوفیان، هیچ سنگدل بیله شقاوت ایلمز
 
سیز تک اوزگه میزبان بیله قوناقی یوخلاماز
 
سیندیروب عهد آز زماندا دلده دردین چوخلاماز
 
میهمانین اللری اوسته بالاسین اوخلاماز
 
سیز کیمی اوزگه بیله بیر امره سبقت ایلمز
 
امّت اسلام وورماز پیکر اسلامه تیر
 
پیشوای دینی یخماز توپراق اوسته سر به زیر
 
اهل قرآن اوز امامین ایلمز هرگز اسیر
 
بوینونا زنجیر وورماز هتک حرمت ایلمز
 
سیز اولارسوز دللره چوخ داغ حسرت وورموسوز
 
روح زهرا اُلدوروب طبل بشارت وورموسوز
 
گردن بیماره زنجیر عداوت وورموسوز
 
سیز کیمی بیماره هیچ ملّت اذیّت ایلمز
 
سیز او گون بیت الحرام اهلین اذیّت ایتمیسوز
 
آت دوشونده قوموسوز، چولده گریزان ایتمیسوز
 
یخمیسوز چوخ خانمانلار خیمه تالان ایتمیسوز
 
هیچ بیر امّت سیز کیمی دینه خیانت ایلمز
 
کربلاده ال آچوب راه فراتی باغلیسوز
 
سولدوروب زهرا گلین، قلب بتولی داغلیسوز
 
بیزلره ایمدی باخورسوز رقّتیله آغلیسوز
 
بیر ایله طغیانه جبران اشک حسرت ایلمز
 
سیز اولارسوز صاحب نصّ جلی اُلدورموسوز
 
اهل معنای کتاب منزلی اُلدورموسوز
 
روح پیغمبر حسین ابن علی اُلدورموسوز
 
سیزلره محشرده پیغمبر شفاعت ایلمز
 
کوفیان، مشمول لعن ملّت آینده سوز
 
دانمیسوز اللهوزی ، عبد ذلیله بنده سوز
 
ای سرافکنده جماعت، حشره تک شرمنده سوز
 
آغلیون، بو آغلاماقلار رفع خجلت ایلمز
 
حقّی تاپماق بی هدف دل داغلاماقدان یاخشیدور
 
حق دانیشماق مُهر ایدوب دل باغلاماقدان یاخشیدور
 
دولت جبّاری یخماق آغلاماقدان یاخشیدور
 
اشک باطل ذرّه جه حقّه اعانت ایلمز
 
بو هدفسیز آغلاماق آشفته ایلر حالوزی
 
ایلیون نهضت آلون اوز گیتمیش استقلالوزی
 
تا ایده تامین او استقلال استقبالوزی
 
چاتماز استقلاله هر ملّت که نهضت ایلمز
 
تائبین وار الفتی افکار شورانگیزیله
 
دائماً نوحه یازار تبیان آتش ریزیله
 
دولدورار اوز دفترین اشعار نهضت خیزیله
 
مردمی بیدار ایدر مشمول غفلت ایلمز
 
شاعر : مرحوم تائب
 
******************************
 
ورود به کربلا
 
ای بلالی زینب، حاضر اول بلایه
 
قافله‌م یتیشدی، دشتِ کربلایه
 
بوردا امتحان وئرر‌م
 
دین یولوندا جان وئرر‌م
 
ای بلالی زینب 
 
بو منایِ عشقین، وار گوزل صفاسی
 
یتمیشه یاخین وار، مه لقا فداسی
 
باشلاریندا واردور، دینِ حق هواسی
 
بوردا جوش اید‌ر قانلار
 
قان ایچرله قربانلار
 
ای بلالی زینب 
 
عهد آلیبدی مندن، ذاتِ پاکِ جانان
 
جانیمی ائد‌م بو، دینِ حقّه قربان
 
قویمارام که نُقصان، تاپسین عهد و پیما
 
من وارام سوزوم اوسته
 
هر بلا گوزوم اوسته
 
ای بلالی زینب 
 
دیندی گلسِتانین، غملی باغبانی
 
دوزمرم گورنده، آفتِ خزانی
 
قویمارام کی سولسون، بیله گولسِتانی
 
سو یرینه قان وئرر‌م
 
باغِ دینه جان وئرر‌م
 
ای بلالی زینب 
 
گوللریم بو چولده، تشنه سولسا سولسون
 
قانلا باغبانین، چشمی دولسا دولسون
 
گر خزان بو عمروم، باغی اولسا اولسون
 
باغِ دین بهار اولسون
 
حکمی پایدار اولسون
 
ای بلالی زینب
 
واردی بیر ائلیم باش فکرینی آتالّار
 
قانه دین یولوندا، تشنه لب باتالّار
 
توپراقا بو چولده، قانلارین قاتالّار
 
لاله رنگ اولار بو یر
 
شوریله دولار بو یر
 
ای بلالی زینب 
 
اکبریم دوشر گول جسمیده یاراسی
 
کربلانی چولقار، عطرِ دلرُباسی
 
نعشی اوسته اوخشار، شوریله آناسی
 
آه و زار ائد‌ر لیلا
 
چوللره دوشر لیلا
 
ای بلالی زینب
 
قاسمِ جوان بو، سینه‌مین قراری
 
یعنی مجتبانین، نازلی یادگاری
 
جان وئر‌ر بدنده، زخمِ بی‌شماری
 
آغلادار منی آغلار
 
اودلو سینَمی داغلار
 
ای بلالی زینب 
 
قارداشیم ابالفضل، گورسَدَر وفاسین
 
توپراقا سالالّار، قامتِ رساسین
 
آرتیرار کنارِ علقمین صفاسین
 
باغِ عشق اولار علقم
 
عطریله دولار علقم
 
ای بلالی زینب 
 
من ئوزوم ییخیلّام، دلده سوز و سازیم
 
سو یانیندا قاندیر، آبِ دستمازیم
 
قانلی قتلگهده، واردی بیر نمازیم
 
ئوللم اول نماز اوسته
 
عشقِ بی‌نیاز اوسته
 
ای بلالی زینب 
 
شاعر : مرحوم تائب
 
**************************
 
ورود به کربلا
 
سرزمین کربلا وادیّ ایمندور باجی
 
جلوه گاه نور وجه حیّ ذوالمندور باجی
 
محترم یردور بو یر دارالصّفای عشقدور
 
اهل عشق آنلار بو یر کرب و بلای عشقدور
 
من خلیل عشق، بو صحرا منای عشقدور
 
قان شَمیمی بو سوزه برهان مُتقَندور باجی
 
دولدوروب دشت عراقی باشداکی شوریم منیم
 
من کلیم ا... عشقم، کربلا طوریم منیم
 
دلده اَرنی، جلوه ی جاناندی منظوریم منیم
 
جلوه گر بوردا حسینه نور ذوالمندور باجی
 
بو بیابان بلانین بیر بیوک غوغاسی وار
 
آل طاهانین بو یرده محشر کبراسی وار
 
زینبیم بوردا حسینین یوم عاشوراسی وار
 
قانیمه باتماقلیقا بو یر معیّندور باجی
 
اوزگه بیر مقصودیله بو سرزمینه گلمیشم
 
ایتماقا حائل خدنگ کفره سینه گلمیشم
 
باش و جانیمدن گیچوب ترویج دینه گلمیشم
 
دین اسلامین رواجی بوردا منلندور باجی
 
عالم ارواحیده نشر اولدی طومار غمیم
 
شُقّه آچدی باشیم اوستونده بلایا پرچمیم
 
هر مصیبتده باجی سنسن شریک اعظمیم
 
عهدیمون نقصانینون تکمیلی سنلندور باجی
 
ای باجی اوّلده من عهد ایتموشم جانانیله
 
گلشن اسلام و قرآنه ویرم سو قانیله
 
گلمیشم بو دشته یتمیش بیر نفر قربانیله
 
کعبه ی مقصود بو وادیّ ایمندور باجی
 
باده ی عشقیله جام دل ایله سرشاردی
 
که وجودیم موبمو مشتاق وصل یاردی
 
بیر بیابان شاهراه محفل دلداردی
 
بوردا شمع جلوه ی دیدار روشندور باجی
 
بو همان یردور آتام جدّیم ویروب باجی خبر
 
بوردا مظلوم ایلر آل اللهی اشرار کَفَر
 
ایستر ایتسون ظلمینی اشرار کینه مُستتر
 
لیک مظلومیّتیم گون تک مبیّندور باجی
 
دشمنیم مظلوم ایدر بو چولده آل هاشمی
 
اُلدوره لّر بیر به بیر یتمیش نفر یولداشیمی
 
خاک و خون ایچره یخالّار اوغلومی قارداشیمی
 
کربلا یتمیش ایکی قربانه مدفندور باجی
 
اکبری باشدان قلجلار ایله قوم بدسیَر
 
قان آخوب باشدان، یوزینده شَدّه ی مرجان دوزر
 
قرمزی قانیله صحرای بلانی خوش بزر
 
باخسا هر کیمسه دیر بیر طرفه گلشندور باجی
 
قاسمی آتدان یخار ظلمیله قوم اشقیا
 
اکبریم تک دینه ایلر تشنه لب جانین فدا
 
امّ لیلایه اولار آغلار آناسی همصدا
 
ویرسه سس اوغلی اُلن ثَکلایه احسندور باجی
 
بوردا عبّاسین ایده لّر چاک چاک اعضاسینی
 
قان ایدر لبریز جام دیده ی شهلاسینی
 
سو کنارینده یخالّار قدّ سرو آساسینی
 
اوندا بولّم ظاهراً فاتح بو دشمندور باجی
 
اصغریم سوز عطشدن غنچه ی گل تک سولار
 
هولدن اوچ شعبه لی پیکانِ ظلمه رام اولار
 
اوخلانار حلقی، قزل قانیله قونداقی دولار
 
محفل جانان او قانیله مزیّندور باجی
 
خاک و خون ایچره یخار دشمن بو پابند غمی
 
کشف ایدر هر یاره جسمیمده رموز مُبهمی
 
خوش بزر اوخلار منیم سانسیز یارالی سینمی
 
گل وجودیم تیرِ ظلمِ خصمه مخزندور باجی
 
بیر زیارتگاه اولار بو سرزمین پرمحن
 
ایسترم منده گلر بو تائب شیرین سخن
 
ذکر ایدر بو شاه بیتی دوره سینده سینه زن
 
سرزمین کربلا وادیّ ایمندور باجی
 
شاعر : مرحوم تائب
 
*********************
 
مجلس ابن زیاد ملعون
 
جفا پیکانلارین قویما کمانه یابن مرجانه
 
یارالی دللری ایتمه نشانه یابن مرجانه
 
گتورمه توسن کفرون بیله میدان جولانه
 
غروریله شماتت ایلمه چوخ اهل ایمانه
 
بو قدری دل یاراسی وورما قلب آل عمرانه
 
قان اولموش دللری دوندرمه قانه یابن مرجانه
 
حیا قیل بیر بیله شرم و حیا بنیانینی یخما
 
فشاره سالما آل بوترابی بیر بیله سخما
 
سسون کس، آز دانش، گفتاریده اندازه دن چخما
 
گتورمه چوخ یالان سوزلر بیانه یابن مرجانه
 
اوزون آزما، غروریله دولاندورما گوزون گوزله
 
هوای نفسیله بیخود دانیشما، اوز سوزون گوزله
 
بیله چخما اوزوندن، هوشه گل ظالم اوزون گوزله
 
جهنّم تک بیله چکمه زبانه یابن مرجانه
 
ازل باخ گور طرف کیمدور اولان ای منکر مذهب
 
صورا طعن و شماتت قیل شروع ایله صورا مطلب
 
آتامدور نفس پیغمبر، منم زهرا قیزی زینب
 
منم مرضیّه زهرادن نشانه یابن مرجانه
 
بیزوخ اوّل اولوب آب و گلیمیز نوریله تخمیر
 
گلوبدور حقّیمیزده سوی حقدن آیه ی تطهیر
 
بیزوخ بو آیه ی تطهیر اوچون معنا، بیزوخ تفسیر
 
بیزوخ مشمول هر عالی معانه یابن مرجانه
 
بیزوخ روح ولایت، بیزده انوار ولایت وار
 
بیزوخ معنای عفّت، بیزده عفّت وار نجابت وار
 
جنایت اهلی سیزسوز، طینتاً سیزده خباثت وار
 
سیزی یاخشی تانور اهل زمانه یابن مرجانه
 
بیزوخ که جدّیمیز محبوب ذات حیّ اکرمدور
 
اونیله فخر قیلّوخ، مفخر اولاد آدمدور
 
بیزوخ آدم باشیندا سایه میز تاج مکرّمدور
 
یتر روزی بیزیله انس و جانه یابن مرجانه
 
بیزوخ آزاد ایدن خلقی، ووران بند و رسن سیزسوز
 
بیزوخ روزی رسان ماسِوا، روزی کسن سیزسوز
 
بیزوخ عبد خدای ذوالمنن، عبد وَثَن سیزسوز
 
بیزیله دور ایدر دور زمانه یابن مرجانه
 
حسینیم حقّیدی، حق سوز دیدی، حقّه طرف گیتدی
 
مجازه اگمدی باش، باحقیقت باهدف گیتدی
 
قزل قانیله قویدی باشینه تاج شرف گیتدی
 
ویروب درس شرف اهل جهانه یابن مرجانه
 
ولی سن عنصر ناپاکسن میشوم طینت سن
 
نهادوندا خباثت واردی، بیر تخم خباثت سن
 
سراپا شرّسن، روح شقاوتسن جنایتسن
 
توکوبسن چوخلی قانلار جابرانه یابن مرجانه
 
ایله بی شرم سن فکر ایتموسن کیملر اسیروندور
 
اسیرون رهروان حقدی، باطل اوز مسیروندور
 
خبیث و فاسق و فاجر اوزونسن هم امیروندور
 
اولوبسان منتسب سفیانیانه یابن مرجانه
 
سن ای روبه صفت فکر ایتمه قول باغلی اسیرم من
 
ائلیم یوخ طایفم یوخ دلشکسته دستگیرم من
 
آتام شیرخدادور شیرزن بیر ماده شیرم من
 
اولار شیرین بالاسی شیر یا نه یابن مرجانه
 
بیله سانما اسیرم من، بیله قولدا رسن گلدیم
 
حسینین عشقینه اولدوم اسیر مُرتَهَن گلدیم
 
حسینیم باشیله گوردوم گلور بو بزمه من گلدیم
 
گیدر زینب حسین گیتسه هایانه یابن مرجانه
 
اسیر عشق اولدوم، امتحاندان چخماقا گلدیم
 
سنون روح کثیفون قدرتیمله سخماقا گلدیم
 
جنایتخانه وی اوز باشیوه من یخماقا گلدیم
 
گرک ویران اولا هر ظلمخانه یابن مرجانه
 
سن اُلدوردون حسینی، هندین اوغلی کامگار اولسون
 
پوزولسون رونق اسلام، اسلام اهلی خوار اولسون
 
حسینیم گیچدی جاندان دین و قرآن پایدار اولسون
 
هم استقلال آلا اسلامیانه یابن مرجانه
 
حیا قیل بیحیا تشکیل ظلمی قورما بیر بیله
 
جفا بسدی، ستمله عالمی دولدورما بیر بیله
 
فناریله حسینین لبلریندن وورما بیر بیله
 
دگل ضربت سزا غنچه دهانه یابن مرجانه
 
بابامیز حضرت طاها اُپوب بو گل دوداقلاردان
 
آتامیز عالمه مولا اُپوب بو گل دوداقلاردان
 
آنامیز حضرت زهرا اُپوب بو گل دوداقلاردان
 
اوتانمورسان وورورسان تازیانه یابن مرجانه
 
بولورسن هیچ توکوبسن سن کیمین ای بیحیا قانین
 
توکوسن سو یانیندا تشنه شاه کربلا قانین
 
نه شاه کربلا بلکه توکوبسن مصطفی قانین
 
چتیندور خونبها بیر ایله قانه یابن مرجانه
 
نه اندازه سنی سرمست ایدوبدور باده ی دنیا
 
عزای دیندور، جشن عمومی ایتموسن برپا
 
چالور رجّاله لر اوینور سالوبلار مجلسه غوغا
 
ندور بانگ نی و چنگ و چغانه یابن مرجانه
 
ایشیتدی بو بیاناتی خانیمدان ابن مرجانه
 
یریندن دوردی ایتدی حمله دخت شیریزدانه
 
خانمدا دوردی، حمله ایتدی بی پروا دلیرانه
 
دیدی ساکت اول ای شوم زمانه یابن مرجانه
 
حسینیمدن صورا مین ایل هر آنِ عمری بولّم من
 
اودور هر گونده مین یول برملا اُلّم دیریلّم من
 
آخار گیزلینجه اشکیم، خوردا قیزلار باخسا سیلّم من
 
مبادا غم ییه بیر نازدانه یابن مرجانه
 
بیله ننگین حیاتی هر بد و نیکی سیچن نیلر
 
کفن بیر گونده یتدی نازلی قارداشه بیچن نیل
 
اُلومدن قوخماقی دین اوسته جانیندن گیچن نیلر
 
جانیمدان گیچموشم منّتدی جانه یابن مرجانه
 
حُرِیث اوغلی دیدی ابن زیاده بو نه عالمدور
 
گورورسن بیر خانم که دردی وار پیچیده ی غمدور
 
گیدوب قارداشلاری الدن غریق اشک ماتمدور
 
ندور رفتارِ بس نابخردانه یابن مرجانه
 
اونی سن قصد ایدنده بو کسوک باش زینبه باخدی
 
اریتدی قلبیمی حسرت باخیشدا، یاندیروب باخدی
 
او زیبا گوزلریندن قانه باتموش گوزیاشی آخدی
 
دوزوب سیم اوسته گوهر دانه دانه یابن مرجانه
 
او حسرتلی باخیش میزاندور بیر رمز رافتدن
 
حکایت ایلوری قارداش باجیلیقدا محبّتدن
 
گوتور ال نچّه قارداشی اُلن بیر یاسلی عورتدن
 
تغیّر ایتمه قارداشسیز قالانه یابن مرجانه
 
اونی درد آغلادور، دردین اورکده ایلمه تجدید
 
بو زینبدور، وقار فاطمی وار بوندا بی تردید
 
اُلومله ایلمزله قارداشی اُلموشلری تهدید
 
جسارت ایلمه بو باغری قانه یابن مرجانه
 
دوتوب دوتقون آیین اطرافینی گوزیاشیلی اولدوزلار
 
دگوبدور بیربیره آغلار، گلور داده اوغولسوزلار
 
دوتوب دامانینی واعمّتا سسلر خانم قیزلار
 
چخوب ناله صداسی آسمانه یابن مرجانه
 
ندور داغ عزیزان بولمه سن ظالم بولر زینب
 
او داغ حسرت افزانی نجه دلدن سیلر زینب
 
نه لازم زینب اُلدورماق، بو دردیله اُلر زینب
 
حسینسیز ایلمز رغبت جهانه یابن مرجانه
 
حُرِیث اوغلی نصیحت ایلدی گرچه او بی عاره
 
یوخیدی قابلیّت گوش جان ویرسون او گفتاره
 
خباثت آرتیروب اوندا ولیکن نفس امّاره
 
دیدی قان توک بویا دنیانی قانه یابن مرجانه
 
اله فرصت سالوبسان خاصّ و عام اُلدور اوزون ساخلا
 
اوتانما ذرّه جه پیر و غلام اُلدور اوزون ساخلا
 
دی ظاهرده مسلمانم امام اُلدور اوزون ساخلا
 
باشارسان ضربه وور اسلامیانه یابن مرجانه
 
جهانه (تائبا) گلمز حسین تک مردِ راد اوغلی
 
حسیندور روح زهرا، شیر حقّین شیرزاد اوغلی
 
حسین یوخدور، گر اولسا سسلنر مینلر زیاداوغلی
 
ولو بیر مرتبه گلسه زبانه یابن مرجانه
 
شاعر : مرحوم تائب
 
***********************
 
 حضرت امام زمان (عج)
 
گنه شوره گلن باشیم هوای وصل یار ایلر
 
هوای وصل یاریله ئوزین غمدن کنار ایلر
 
سروش وحدتیمدن گوش هوشه بو ندا گَلدی
 
که یزدان نیمه شعباندا لطفین آشکار ائیلر
 
اولار فجر رجا جیب افقدن برملا ظاهر
 
هامی نومید دن یأسی آلار امّیدوار ائیلر
 
که یعنی حجّت ابن العسگری صاحب زمان مهدی
 
بو دنیایه گلن گوندور بو گفتارین کرار ایلر
 
او بیرمولود دور سامّره ده گلدی بو دنیایه
 
اونون نوریله سامرّا جهانی نوربار ایلر
 
آتاسی بومحمّددور آناسی حضرت نرگس
 
باباسی احمد مرسَل اوختم هشت و چار ایلر
 
اصولاً شاخه گلدن وئرر باش هرگل نرگس
 
بو گل دین نرگسیندن ئوز جمالین آشکار ایلر
 
همیشه جانب شهدن مُبَرهَندور گلر عسکر
 
و لیکن عسکریدن جلوه ، بو شاه کبار ایلر
 
یاشارحاضرده سکّیز ایل آتاییله آناییله
 
آتاسیدان صورا دنیاده غیبت اختیار ایلر
 
گَزَرمین حسرتیله پرده غیبتده مین لر ایل
 
باخار هی ذوالفقاره گوزیاشین گوزدن نثارایلر
 
وئرر صیقل مُداوِم ذوالفقارِ تیز و برّانه
 
باخار آغلار گوزیله کربلایه آه وزار ایلر
 
دییَرقالدی الهی یئرده آخر جدّیمین قانی
 
منی بو ماجرای غمفزا چوخ بیقرار ایلر
 
توکر گوزیاشینی حقدن ظهورین دمبدم ایستر
 
او قانی آلماقا چوخ آرزو اول شهریار ایلر
 
الهی وئر اجازه حضرت صاحب زمان گلسون
 
جهان ناامن دورجان جهان روح اَمان گلسون
 
یوزین ای طلعت دین ابر غیبتدن کنار ایله
 
دوتوب ظلمت جهانی نوریویله نور بار ایله
 
اوقدری قالمری دین باغینه باد خزان اسسین
 
گل ای دین صاحبی دین گلستانین نو بهار ایله
 
اورکلر قانه دوندی گلدی بدعت بدعت اوستوندن
 
یئتیش امداده بو بدعتلری گل تار و مار ایله
 
یاتوبدور امّت قرآن قالوبدور خواب غفلتده
 
بو قرآن اهلینی هوشه گتور بیر هوشیار ایله
 
یولوندا منتظردور شیعه لر چوخ انتظاریله
 
ئوزون ای مُنتَظرگل اختتام انتظار ایله
 
جهالت قدرتی ائیلر حکومت سطح دنیاده
 
ئوزون گل یر یوزین ده گوهر دانش نثار ایله
 
اجانب دائماً قرآنیانی خوار و زار ایستر
 
ئوزون گل مسلمینی خوارائدن اشخاصی خوار ایله
 
تَجَمُّل آرتوب از بس آلدی دللردن تجلاّنی
 
تجلّی بخش عالم گل تجلّی آشکار ایله
 
هره بیر یول دوتوبدور ظالمانه عدل فرض ائیلر
 
بیله ظالم لری ئولدور جحیمه رهسپار ایله
 
فسادیله دولوبدور یئریوزی یاغیره الرَّحمن
 
فسادی یئر یوزوندن یغ صلاحی استوار ایله
 
عدالت یوخدی دولورموش جنایت سطح دنیانی
 
گل ای شاه عدالت جو عدالت بَرقرار ایله
 
شماتتدن یانوب تاکی اورکلر زخمدار اولسون
 
ئوزون لطفاً مداوای قلوب زخمدار ایله
 
اولوب دینی مجالس خالی امّا فسق ائوی مَملوّ
 
جماعت چخدی یولدان یولاری گل راهوار ایله
 
چخوب بیرعدّه تحریف ایلیور احکام قرآنی
 
او قومی طعمه شمشیر تیز و آبدار ایله
 
گوزی یولدا نقدر آغلار گوزیله شیعه لر یانسون
 
الونله پاک خونین اشگ چشمِ اشگبار ایله
 
دوزاق تا کی شهیدان وفا قانی قالا یئرده
 
گل آل بوقانلاری اعدانی تیره روزگار ایله
 
حقیقی مُنْتَقم گل آل ئوزون ئوزجدّیوین قانین
 
دل مجروح زهرا دن بیر آز کسر شرار ایله
 
ئوزون آماده ایله ( تائبا ) بیر پاک قلبیله
 
ولیعصر آدینی اوندان صورا دلده شعار ایله
 
شعار پوچ بی علم وعمل هرگز ثمر وئرمز
 
معاصیدن اوزاق دوش ئوز ئوزین پرهیز کار ایله
 
گلنده حضرت صاحب زمانون شرمسار اولما
 
آچیق آنیلّه سن درک حضور شهریار ایله
 
شاعر : مرحوم تائب
 
**************************
 
زبانحال حضرت رقیه (سلام الله)
 
یانا یانا او زمان اذن ویردی گوزیاشنا
 
خطاب ایدوب بو دلیله آتاسینون باشنا
 
نه ظلم ایدوب بابا گور سنگدل سپاه منه
 
که روز روشن اولوب لیله ی سیاه منه
 
آلوبلا معجر گلدوزیمی جفائیله
 
آچاندا غارت الین قوم دین تباه منه
 
گورنده ظلمیله گلدوز معجریم آلینوب
 
ویروبدی قمچی ووران معجر سیاه منه
 
ایدوبله ناقه ی عریانه گه سوار منی
 
اولوبدی توشه ی ره یولدا رنج راه منه
 
ووروب یخوبلا گهی چولده قالموشام یالقوز
 
تاپولمیوب اولا بیر کیمسه دادخواه منه
 
ایاق یالین دولانوب چولده دوشموشم دلسیز
 
کنار خار مغیلان اولوب پناه منه
 
قابار ایاقلاریمون قانی، قانلی گوزیاشیم
 
نشان ویروبدی عیان قانلی بیر میاه منه
 
دولانموشام چولی چوخ صاق قولا، سیزیلداموشام
 
ویروب صدا او سیزیلتیمدا گل گیاه منه
 
نه قدر آغلاموشام من سیزیلدیوب ایاقیم
 
گوزوم یاشی ایاقیم قانیدور گواه منه
 
گل جمالیم ایله کهربا کیمی سارالوب
 
که رشک ایدر یوزومی گورسه رنگ کاه منه
 
بویور خانم بیبیمه سالماسون منی گوزدن
 
نظارت ایلسون اول فاطمی نگاه منه
 
بیر آن غفلت ایده گر خانم بیبیم مندن
 
آچار جسارت الین سنگدل سپاه منه
 
یقین وورولّار او قدر اُلدورولّه یولدا منی
 
ترحّم ایلمز اشرار کینه خواه منه
 
نه قدر دردیم اولا سینه ده گینه آزالار
 
او قانلی گوزلر اگر باخسا گاه گاه منه
 
محبّتون آزالوبدور نه قدر یالوارورام
 
آچوب رئوف گوزون ایتموسن نگاه منه
 
گوزومی اشک دوتوب یا منیم گوزوم گورمور
 
بولنمورم ویروب اوز حال اشتباه منه
 
باشون فداسی ندن یوز گوزون کوله بلشوب
 
باخاندا آرتوروری دلده سوز آه منه
 
وفا سپهرینه بیر اولدوزام، یارالی باشون
 
گونوز گونومدی قرانلوق گجمده ماه منه
 
اُلونجه بو یارالی باشدان آیریلان دگولم
 
ولو خرابه ی شام اولسا خوابگاه منه
 
پیاده یول گیدرم بیر دقیقه اینجیمرم
 
به شرط رهبر اولا یولدا راس شاه منه
 
گورن بو حالیمی ذلّتده بولسه قوی بولسون
 
بو خطّ سیریده وار عمده عزّ و جاه منه
 
یازاندا بو سوزی «تائب» تشکّریله دیدی
 
بو خوش بیانی ویروب مقتدر اله منه
 
شاعر : مرحوم تائب
 
 
************************
 
زبانحال حضرت مسلم ابن عقیل (علیه السلام)
 
ئولدورللر اهل کوفه میهمانی یاحسین
 
گلمه آغلار قویما آل مصطفانی یاحسین
 
نامه ده گرچه پیمبر اوغلی یازدیم من ازل
 
اهل کوفه ایلدی بیعت منه بوشهره گل
 
ایندی گلمه لیک واردور فعلیده عکس عمل
 
ئولدوروللر مسلم بی خانمانی یاحسین
 
دشمنه توش اولموشام هرسمته من یول سالمیشام
 
یاره اوستوندن یارابو خسته جانه آلموشام
 
دادرس یوخ قان توکن جلّاد الینده قالموشام
 
اولموشام کثرتده وحدت هم زبانی یاحسین
 
بیرکسیم یوخ قاتل خونخواردور صاق وصولوم
 
تیغیمی الدن آلوبلارقطع اولوب چاره یولوم
 
آچدیلار جرات الی ظلمیله باغلاندی قولوم
 
قوللاریمدا وارعداوت ریسمانی یاحسین
 
بیرغریبم نچّه مین اشرار الینده قالموشام
 
آشنا یوخدور منه اغیار الینده قالموشام
 
بیرگل پژمرده ام مین خار الینده قالموشام
 
ای گل وگلزار دینون باغبانی یاحسین
 
یوخ دیین مسلمدی ای اهل ظلام ئولدورمیون
 
بیرغریبون قتلینه ایتمون قیام ئولدورمیون
 
شرمیسیزلر شرم ایدون نایب امام ئولدورمیون
 
قتلیمی واجب بولور بوقوم جانی یاحسین
 
حیف دور شبه پیمبراکبر تازه جوان
 
روزوشب لیلا قویوب اول نوجوان اوستونده جان
 
ئولدورللر اکر گلگون قبانی کوفیان
 
هجری مجنون ایلر اول مجنون نمانی یاحسین
 
گلمه گلسن سولدوراللار گلشن پیغمبری
 
تیریله سوددن آچاللار شیره خواره اصغری
 
سینه سی اوسته قالار بیکس ربابین اللری
 
دائم آغلار اوخشار اول نجم سهانی یاحسین
 
شاعر : مرحوم تائب
 
************************
 
کوچ از خرابه شام 
 
یات گوشه ویرانه ده سوگلیم لایلای سوگلیم لایلای
 
ای فاطمی گلخانه ده بلبلوم لایلای بلبلوم لایلای
 
من گیتدیم سن قالدون
 
قلبیمه اود سالدون
 
ای عندلیب خوش نوا گل بوداقیمده
 
مین نازیله ناز ایلین ئوز قوجاقیمده
 
قالمیش یانقلی سوزلرون بو قولاقیمده
 
یات بی صدا بو لانه ده
 
سوگلوم لای لای سوگلوم لای لای
 
سن عمه وه بیر روحیدون خسته جانینده
 
بیر شمع تک سندون حسین دودمانینده
 
ترک ایلرم لابد سنی غم مکانینده
 
ای جان تن ویرانه ده
 
سوگلوم لای لای سوگلوم لای لای
 
هرگز رقیه گچمرم من بوبیر سوزدن
 
چوخ تئز دونرمیش گوئیا بیله یوز یوزدن
 
سالدون نه تیز شیرین دلیم عمه وی گوزدن
 
یاتدون بو محنت خانه ده
 
سوگلوم لای لای سوگلوم لای لای
 
آیریلماقیم مشکلدی بو غملی مدفندن
 
آتدون منی دویدون مگر ای قزیم مندن
 
مندن اگز دویساندا من دویمارام سندن
 
ناز ائت من نالانه ده
 
سوگلوم لای لای سوگلوم لای لای
 
عمرون بهارینده سنون گلشنون سولدی
 
تاپدون خزان ویرانسرا دردیله دولدی
 
آخر کفن اگنونده کی پیرهن اولدی
 
یات غمفزا کاشانه ده
 
سوگلوم لای لای سوگلوم لای لای
 
سن بیر ایشیق اولدوز کیمی شامیده آخدون
 
آخدون آخاندا خرداجا قزلارا باخدون
 
باخدون باخاندا عمه وی یاندیروب یاخدون
 
ای غم یین غمخانه ده
 
سوگلوم لای لای سوگلوم لای لای
 
بیر مشکلون وار قلب پر احتراقیمده
 
بیر سوز دیردون سن قالوب بو قولاقیمده
 
سویلردون ای عمه قابار وار ایاقیمده
 
یانام یانار بیگانه ده
 
سوگلوم لای لای سوگلوم لای لای
 
دائم وطندن سوز سالوب طرز صحبتده
 
گوز یاشلی غرق ائتدون ئوزون اشک حسرتده
 
هامی گئدر قالدون ولی سن بو غربتده
 
سوز چوخدی بو افسانه ده
 
سوگلوم لای لای سوگلوم لای لای
 
سن سیز رقیه من دیمه شاد اولوب گوللم
 
ایستکلیسن سن سیز نجه من دوزه بوللم
 
گئتسم گئنه سندن ئوتور شامه من گللم
 
یول گوزله بو ویرانه ده
 
سوگلوم لای لای سوگلوم لای لای
 
تائب سیزه بیر عمردور واردی وابسته
 
نوحه یازار عشقیله ای زار ودل خسته
 
دعوت ائله گلسون گوزل مدفنون اوسته
 
عرض ائتسون اول غم خانه ده
 
سوگلوم لای لای سوگلوم لای
 
شاعر : مرحوم تائب
 
 
****************************
 
در مدح حضرت سید الشهدا امام حسین (علیه السلام)
 
مهرون حسین بو عالم امکانه ویرمرم
 
گنج گراندی قیمت ارزانه ویرمرم
 
دل جایگاه عشق حسیندور بو دلده من
 
بر ایسته سه محبّت بیگانه ویرمرم
 
ای پاک تربتی منه مهر نماز اولان
 
بو مُهر پاکی ملک سلیمانه ویرمرم
 
بو گوز یاسی که سندن اوتور دیده دن آخور
 
بیر دُرّدور که گوهر غلطانه ویرمرم
 
بو اشک شوره شربت شیرین جزاده وار
 
بی جا یره بو اشکیمی دامانه ویرمرم
 
ای سیّد شباب جنان سن یاتان یری
 
مین لر بهشت و روضۀ رضوانه ویرمرم
 
عطرون بهشت عطریدی روح بهشت سن
 
بو عطر پاکی نکهت ریحانه ویرمرم
 
ای کربلا صفاسی مزارون صفاسینی
 
سیر و صفای باغ و گلستانه ویرمرم
 
گر باغ کربلانی تاپام نغمه خوان اولام
 
هرگز مجال بلبل خوشخوانه ویرمرم
 
ایتسن منی قبول قاپوندا گدالیقا
 
بو افتخاری غزّت سلطانه ویرمرم
 
بیر قاره که غمونده سنون گیَّم اگنیمه
 
من بو قَرانی خلعت الوانه ویرمرم
 
مین لر گله تیر شماتت بو نشئه ده
 
آلّام بو جانیمه بیرینی یانه ویرمرم
 
بیر جرعه گر فرات سویوندان ایچم حسین
 
اول جرعه آبی چشمۀ حیوانه ویرمرم
 
عشقون مریض ایدوب منی عشقون طبیب اولوب
 
بو نبضی دست اوطگه طبیبانه ویرمرم
 
دردیم محبّتوندی دواسی محبّتون
 
بو درد عشقی سایر درمانه ویرمرم
 
نام حسین قویوب باشما تاج افتخار
 
بو امتیلزی افسر شاهانه ویرمرم
 
دائم حسیندن اولی عنوان صحبتیم
 
من بو بیانی سایر عنوانه ویرمرم
 
پایانه ویرّم عمریمی عشق حسینیله
 
عمریم گیدر بو عشقیمی پایانه ویرمرم
 
تشریفون اولماسا باشیم اوسته ویرنده جان
 
آسان بو جانی آند اولا جانانه ویرمرم
 
من معرفت سیز آغلامارام بوش اولا الیم
 
بی جا یره بو اشکیمی دامانه ویرمرم
 
من تابعم حسینه او سلطان دین دیوب
 
بیعت الینی زادۀ سفیانه ویرمرم
 
من ( تائبم ) خدا ئوزی توفیق ایدر عطا
 
عمریمجه تن مطالب بطلانه ویرمرم
 

شاعر : مرحوم تائب

 
 
***************************
 

زبانحال حضرت سید الشهدا امام حسین (علیه السلام)

در شهادت شاهزاده حضرت علی اصغر (علیه السلام)

 
پایانه یتوب عهدیله پیمانیم الهی
 
اوخلاندی الیمده قوزی قربانیم الهی
 
بیر الده بالام، یارب آلوب بیر اله قرآن
 
گتدیم بو گون اثبات حق ایتماقلیقا عنوان
 
قرآنی دانوب ایلدیلر ظلمیده طغیان
 
دوتسون بو ستمگرلری قرآنیم الهی
 
سولموشدی الیم اوسته بو گل غنچۀ مینو
 
آهسته ملردی دیه سن بچّۀ آهو
 
یاندی سوسوزوندان بیر ایچیم ویرمدیلر سو
 
باخدیم اونا یاندی دل سوزانیم الهی
 
هر یانه فراتین سویی دریا کیمی آخدی
 
یاندوردی بالامی بو سوسوزلوق اودی یاخدی
 
آغلار گوزیله گه سویا گاهی منه باخدی
 
ایچدی قانینی اصغر عطشانیم الهی
 
صحرای بلا تاپدی بزک گللریمیله
 
عبّاسیمیله قاسمیله اکبریمیله
 
آرتدی بزکی غنچه دهن اصغریمیله
 
جنّاته وورار طعنه گلستانیم الهی
 
قانه بویانوب تشنه بو بیر گوهر نایاب
 
دین گلشنینی ایتدی قزل قانیله سیراب
 
بیر گون اولی بو گلشن آچار مین گل شاداب
 
اعلان اولونار مقصد پنهانیم الهی
 
بیر یرده که چوخ گرم اولا بازار محبّت
 
کالایه خریدار اولا ذات احدیّت
 
کالانی الیمده ساتوب آلّام دولی قیمت
 
محشرده شفاعت اولی عنوانیم الهی
 
نازلی بالامین یتدی بهارینده خزانی
 
سولدوردی اونی باد خزان غنچه زمانی
 
بیر سرخ گلابه بویادی کرب و بلانی
 
باتدی او گلابیله بو دامانیم الهی
 
آز سنّیله نسگل لری عالمده چوخ اولدی
 
واردان ال اوزوب، نغمۀ سو دلده یوخ اولدی
 
سیراب ایدن آخِرده سه شعبه بیر اوخ اولدی
 
باخدیم اونا یاندی دل بریانیم الهی
 
ائلسیز قالانا یاور و غمخوار تاپولماز
 
من ائلسیزه اغیار آرا بیر یار تاپولماز
 
فریاده یتن یوخ، داخی دلدار تاپولماز
 
فریادیمه یت ای حق منّانیم الهی
 
دوز عشقیله دوتدوم سنی، عرضیم یالان اولماز
 
سنده منی دوت بی کسی یاده سالان اولماز
 
دردیم ندی غصّم ندی دلدن آلان اولماز
 
ای درده یتن، دردیمه درمانیم الهی
 
بی یاورم اغیار آرا یاده سالانوم یوخ
 
انصاریم الیمدن گیدوب اصلا قالانیم یوخ
 
نازلی بالامین نعشین الیمدن آلانیم یوخ
 
قالموش الیم اوسته قوزی قربانیم الهی
 
قنداقی قوجاقیمده شرار غمه یانّام
 
بو قانلی چولی صاق صولا حسرتله دولانّام
 
گه صاق صولا حیرتله گیدوب، گاه دایانّام
 
خوناب توکر دیدۀ گریانیم الهی
 
اوخلاندی بو آهو باخیشیم ظلمیله اُلدی
 
حشره کیمی آغلار آناسی بو سوزی بولدی
 
غنچه دوداقی قاچدی باخوب بیر منه گولدی
 
آغلاتدی منی غنچۀ خندانیم الهی
 
بو عرصیه یول شیعه لر ایکاش سالیدی
 
بیر قیدیمه بو قانلی بیاباندا قالیدی
 
رافتله الیمدن قوزی قربانی آلیدی
 
آباد اولیدی دل ویرانیم الهی
 
یاخدیم یوزینه قانینی، خوش صحنه یاراتدیم
 
زلفین بویادیم، ارزش قربانی چوخاتدیم
 
اوجومدا همان قانی دوتوب من گویه آتدیم
 
ساخلا او قانی چرخیده یزدانیم الهی
 
یوز دونروب ایمدی هایانا عزم ایدوم الله
 
چارم کسیلوب، چاره ندور بس نیدوم الله
 
گلمز بو یوزیمدن که خیامه گیدوم الله
 
یوخ دورماقا، یوخ گیتماقا امکانیم الهی
 
خیمه قاپوسین ایمدی کسوب آغلار آناسی
 
فکر ایلوری سیراب اولونوب نازلی بالاسی
 
بولمور بوغازیندا وار اونون کاری یاراسی
 
بی روح دوشوب فدیۀ بی جانیم الهی
 
کیم واردی هرایه گیدوم ایتسونله حمایت
 
خرگاهه سالوم یول، چکورم چوخلی خجالت
 
میداندا دولانسام منه ایله لّه شماتت
 
بی شرمدی چوخ دشمن نادانیم الهی
 
مندن نه دونر درد و بلا، من نه بلادن
 
اعداده جفا جودیله، دویمازلا جفادن
 
فریاد جفاکاری بی شرم و حیادن
 
دیوان ایت اوزون داور دیوانیم الهی
 
سندندی نییم وار منیم ای ورد زبانیم
 
ویردیم سنون اوغروندا نیه گلدی گمانیم
 
یوخدور قالانیم ایمدی، مگر بو باش و جانیم
 
قربان ایلیم من سنه جانانیم الهی
 
من (تائبم) آگاه حسینی شرفیمدن
 
گر تیر شماتت یاغا دورت بیر طرفیمدن
 
حقدور هدفیم، دونمرم اصلا هدفیمدن
 
قرباندی الهی هدفه جانیم الهی
 
من (تائبم) الله بولورم چوخدی گناهیم
 
تکمیلدی پروندۀ سنگین سیاهیم
 
ویرّم قسم اصغر جانینا سینه ده آهیم
 
عفو ایله اوزون واردی نه عصیانیم الهی
 
شاعر : مرحوم تائب
 
************************************
 

زبانحال حضرت سید الشهدا امام حسین (علیه السلام)

در شهادت شاهزاده حضرت علی اصغر (علیه السلام)

 
گل کناره ای آنام یادگاری زینبیم
 
آل الیمدن اوخلانان شیرخواری زینبیم
 
ویر غریب آناسینا اوخلانان بالاسینی
 
اوخشاسین بالاسینا باغلاسون یاراسینی
 
گوزلور اوغلونی رباب ایمدی انتظاریله
 
گوزلرین تیکوب یولا حال انکساریله
 
بولمور اوخلیوبدیلر تیر زهرداریله
 
اگلشوب بوغازینا زخم کاری زینبیم
 
گوردی مرغ روحینون تنگ آشیانه سین
 
صاق صولا دولاندیروب چشم آهوانه سین
 
رمزاً ایلدی بیان العطش ترانه سین
 
گتدی رقّته او نور اهل ناری زینبیم
 
گوردیلر من آغلادیم باخدی اصغر آغلادی
 
اولدی همنوا بیزه قوم کافر آغلادی
 
سس سسه ویروب اودم هامّی لشکر آغلادی
 
چخدی دشمنین گویه آه و زاری زینبیم
 
حرمله ایدوب عیان کینه ی نهانینی
 
کینیله آلوب اله تیریله کمانینی
 
ردّ ایدوب کمانیدن تیر جان ستانینی
 
اوخلادی الیمده بو شیرخواری زینبیم
 
اوخ آتان قولی قوی اوخ سه شعبه زهردار
 
اوخلانان ولی سوسوز بیر ضعیف شیرخوار
 
اوچی سنگدل شقی، سودامر اوشاق شکار
 
گورمیوب جهان بیله بیر شکاری زینبیم
 
اوخلانوب ستاره تک آخدی گیتدی اصغریم
 
گوزلری آخا آخا باخدی گیتدی اصغریم
 
یاخدی، یاندیروب منی یاخدی، گیتدی اصغریم
 
ساندیروب او حسرتی بو فکاری زینبیم
 
چوخ فرحله اوخلانوب ئولدی سوامر بالام
 
لذّت شهادتی بولدی سودامر بالام
 
باخدی نازیله منه گولدی سودامر بالام
 
ایتدی عشقینی بیان احتضاری زینبیم
 
بیر غریب و بیکسم یوخدی قیدیمه قالان
 
بیر آدامسیزام منی یوخدی یادینه سالان
 
نعش شیرخواریمی یوخدی بیر نفر آلان
 
گل بالامی آل آنام یادگاری زینبیم
 
باخبر ایله اوزون اصغرین آناسینی
 
ویر قوجاقینه اونون سودامر بالاسینی
 
اوخلانان بوغازینون باغلاسون یاراسینی
 
اوخشاسون دویونجا بو زخمداری زینبیم
 
نوحه خوان هدایته یتدی حق هدایتی
 
یازدیروبدی (تائبه) بیله بیر کتابتی
 
بیرده خوشدی ذکر ایداق دل یاران مصیبتی
 
آل الیمدن اوخلانان شیرخواری زینبیم
 
شاعر : مرحوم تائب
 
 
********************
 
حضرت رقیه (سلام الله) راه شام
 
بو بیر خبردی که نظمه دوزولدی عنوانی
 
وار اوزگه بیر خبر اودلار تمام دنیانی
 
بو طرزیله که بیان ایلورم بو غملی سوزی
 
همین بو طرزیله خسروشهی بویورموش اوزی
 
علاوه ذکر ایلیوب سیّد شهاب الدّین
 
همین بو واقعه ی درد و غمفزا شرحین
 
علاوه بونادن ایکی عالِمین دیَن سوزودی
 
کتابه ابن شَکوئی یازان سوزون اوزودی
 
همین کتاب آدی مصباح دور او شیخ کبار
 
صحیفه اوچ یوز و دوخسان بشینده بیله یازار
 
شکسته حالیله اطفال شهریار نجف
 
گیدردی شام یولوندا دیار شامه طرفاو نازنین
 
حسین یتیمه لریندن بیری چوخ آغلاردی
 
اسارته دوزه بولمزدی سینه داغلاردی
 
او دمده زجر دیدی آز منی کباب ایله
 
یتیمه بسدی داخی ناله ایتمه بیر بیله
 
اورگی درده گلوب تازده دن او نازلی بالا
 
یوزون جدایه دوتوب عرض قیلدی یا اَبَتا
 
بو بس دگل که سو ویرموبله اُلدورنده سنه
 
یول اوسته مانع اولور زجر آغلینده منه
 
دیر ووراخ سیزی بیز اُلدوراخ، سیز آغلامیون
 
دانیشمیون دیمیون بلکه سینه داغلامیون
 
بو سوزده زجر شقاوتده حدّدن چخدی
 
او نازنین بالانی ووردی ناقه دن یخدی
 
او ساعتیکه اونی زجر ناقه دن سالدی
 
دوشوب او دشتیده بی هوش او نازنین قالدی
 
حسین تشنه لبه تشنه لب جگر گوشه
 
بیر آز صورا آییلوب ضعفیدن گلوب هوشه
 
گوروب قبیله گیدوب وار نه عمّه لر نه آنا
 
دوروب ایاقه قاچوب بیر قدر اویان بویانا
 
حیاتیدن داخی اول نازنین الین اوزدی
 
یول اوسته گل یوزینه اشک دانه سین دوزدی
 
قاچاردی صاق صولا سسلردی عمّه جان گیتمه
 
اماندی ساخلا ایاق، باغریم اولدی قان گیتمه
 
اماندی ناله سسیم چرخ اطلسه چخدی
 
ستمله زجر منی ووردی ناقه دن یخدی
 
دلینده ناله زبسکه دولاندی خار اوسته
 
او گلعذار یورولندی داخی اولوب خسته
 
جواب گلمدی اولدی جوابیدن مایوس
 
دگیشدی طرز بیانین او محنته مانوس
 
دلینده وا اَبَتا دمبدم گلوب داده
 
دیردی چولده یخلدیم بابا یتیش داده
 
ندن رسوم وفانی بو چولده ترک ایدوسن
 
قالوب یتیمه قیزون ای بابا هارا گیدوسن
 
ایدنده بو دلیله ناله گوزده گوزیاشلی
 
جداده دوردی داخی گیتمدی حسین باشی
 
گلوب یتوردوله سجّاد امامه احوالی
 
اولاندا سیّد سجّاد او حالیدن حالی
 
بویوردی زینب نالانه عابد نالان
 
بابام باشی دایانوب آیری سرّ ایدور اعلان
 
یتیمه قیزلارا سن ویر بو یرده سان عمّه
 
دوشوب یول اوسته یقین واردی بیر قالان عمّه
 
گیچوب او حالیده گوزیاشی زینبین قاندان
 
گچیتدی قیزلاری یول اوسته بیر به بیر ساندان
 
چاغوردی قیزلاری بیربیر آدیله اول بیکس
 
جواب ویردی هامی، لیک ویرمدی بیری سس
 
بولوب دوشوبدی یول اوستونده بیر یتیمه قالوب
 
بو قصّه زینبین الدن قرار و صبرین آلوب
 
اورک یانوب، گوزونی گوزیاشیله دولدوردی
 
گلوب نوایه ایکی اَللی باشینه ووردی
 
اوزونی ناقه دن آتدی یره او کان ادب
 
مباشر اولدی اونی تاپماقا خانم زینب
 
گلن یولا قِییدوب دیده ی پر آبیله
 
سراغ ایدردی او شیرین دلی شتابیله
 
گوزونده اشک، دلینده نوا او کان حیا
 
گزردی چولده ایدردی بو دللریله ندا
 
هایاندا قالموسان ای سینمون قراری بالا
 
سسیمه سس ویر حسینون گلِ بهاری بالا
 
بو دشته شور سالوب هاردا دوشموسن دلسیز
 
حجاز گلشنینون خوشنوا هزاری بالا
 
دولانورام چولی، هر یردن عطریوی آلورام
 
دوتوبدی عطرون عجب دشت و کوهساری بالا
 
دولانموسان چولی بولّم چوخ عمّه سسلموسن
 
یورولموسان، کسیلوب سینن اختیاری بالا
 
پیاده قاچموسان ازبس بو چولده صاق و صولا
 
ایاقیوین بولورم واردی چوخ قاباری بالا
 
قابار ایاقلاریوین آلتینا باتوبدور خار
 
یتوب ایاقلاریوا چوخلی زخم کاری بالا
 
ایاقلارون قانی صحرانی قرمزی بوییوب
 
ویرور بو دشت نشان صحن لاله زاری بالا
 
سخلموسان دی گوروم هانسی خار سایه سینه
 
حسین تشنه لبین طفل گلعذاری بالا
 
گل اوزلی غنچه دهن دوشدون آیری گلشندن
 
هایاندا اولدی خزان عمریوین بهاری بالا
 
بولنمورم که سن آهو باخشلی کبک خرام
 
هایاندا اولدون اجل دامینون شکاری بالا
 
اوزون دوشوب بو بیاباندا قالموسان یالقوز
 
یول اوسته ساخلاموسان بیر بیوک قطاری بالا
 
قالوب آنان نگران وای بالام دیر آغلار
 
ایدوب سرشگی گل آلوده رهگذاری بالا
 
یول ایسلادوبدی زبس گل نشین اولوب ناقه
 
دوشه قطار یولا یوخدی اقتداری بالا
 
حیالی فاطمه هی سسلنور باجیم قالدی
 
دوتوبدی کوه و بیابانی آه و زاری بالا
 
اودور بو قافله نین ماهی، سنده اولدوزیسان
 
سنون یولوندا قالوب چشم اشکباری بالا
 
گوزتلوری یولوی آغلوری آنان لیلا
 
علیّ اکبرین ای نازلی یادگاری بالا
 
بابان باشی دایانوب نیزه ده داخی گیتمز
 
باخور گلن یولوا چشمی انتظاری بالا
 
حسینیدن خجل اولّام آپارماسام سنی من
 
گوزتلوری منی اول عشق تاجداری بالا 
 
دیلنیده وای بالا حیران گزردی صحرانی
 
او چولده بلکه سلامت تاپا او نالانی
 
یاناردی دلده او خاتون او حال پراسفه
 
علاقه سی اونی هردم چکردی بیر طرفه
 
یتنده بیر یره گوردی او معدن عصمت
 
کناریده اوتوروب بیر سیاهپوش عورت
 
آلوب همین بالانین باشینی دیزی اوسته
 
محبّتیله اونی ساخلیوب گوزی اوسته
 
زبس او قیز یورولوب عالمی نظردن آتوب
 
او عورتین دیزی اوستونده دینجلوبدی یاتوب
 
چاتوبدی عین مرامه او سوز و سازیله
 
جهانه ناز ایدوری یوخلیوبدی نازیله
 
بویوردی زینب مظلومیه او حورسیَر
 
یتیمه نی بیله ساخلالّا بو جهاندا مگر
 
یتیمدار اولان نازیله گجه یاتماز
 
یتیم اوشاقلاری گوزدن دقیقه ای آتماز
 
آلوب کنارین هر درد و غصّه دمسازین
 
چکه اُلونجه گرک هر یتیمه نین نازین
 
علاوه سنسن حسین شهید قیّومی
 
گوز اوسته ساخلا گیلن بو صغیره مظلومی
 
سنه نه قدر قیزیم ناز قیلسا نازیله
 
تمام نازینی چک سنده مین نیازیله
 
بو سوز جهانیده مشهوردور مسلّم دور
 
یتیمه گوگلونی آلماق ثواب اعظم دور
 
نه قدر زحمتی چوخ اولسا آز حساب ایله
 
یتیمه دور بو بالا، گوگلون آل ثواب ایله
 
بو نازدانه نی سن جان کیمی کناریوه آل
 
اورک یارالارینا خوش دلیله مرهم سال
 
یانوبدی نچّه زماندور آتا فراقینده
 
بونون خزان اثری واردی گل دوداقینده
 
یاخونلاشوب گوروسن عمر گلشنی سولسون
 
او قدر قالموری عالمده غصّه مرگ اولسون
 
اماندی مهر و وفا رسمینی ایتورمه قیزیم
 
یتونجه شامه بو قیزدان گوزون گوتورمه قیزیم
 
خرابه یرده حسینون باشی قوجاقینده
 
غمیله جان ویره جاقدور دوداق دوداقینده
 
بو سوزده زینب مظلومه اودلانوب دلدن
 
خطاب قیلدی بیان ایت منه گوروم کیمسن
 
مگر عزایه باتوبسان نه غم لباسیدی بو
 
گیوبسن اگنیوه آیا کیمون قراسیدی بو
 
اوزیوی ایلموسن هانسی شمعه پروانه
 
بو ساچلارون بویانوب هاردا قرمزی قانه
 
ندن بیله پوزولوبسان دچار محنتسن
 
ندور دلیلی که بیله خمیده قامتسن
 
توکورسن اوغلی اُلنلر تک اشک خون گوزدن
 
بو قان کیمون قانیدور زلفیوه یاخوبسان سن
 
بلالی زینبین اود سالدی اودلی سینه سینه
 
سسون چوخ اوخشیوری فاطمه آنام سسینه
 
مینم آنامدا بیله خوش بیان و صحبتیدی
 
اودا سنون کیمی عیناً خمیده قامتیدی
 
خمیده قدّلوقوندان بتول منظرسن
 
بیانیده دانیشاندا آنامه بنزرسن
 
جواب ویردی خانم زینبه او حور شیم
 
بلا خزینه سی پهلوشکسته فاطمیم
 
او گونکه ثانی ایاقدان منی ستمله سالوب
 
سینوب قابرقالاریم قامتیم خمیده قالوب
 
مدینه دن چخالی بو خمیده قامتیله
 
الیم بِئلیمده دولانّام بنات عصمتیله
 
بو قاره که گوروسن درد و غم لباسیدی بو
 
عزالی بیر آنیام اوغلومون قراسیدی بو
 
شهید اولوبدی بالام قالموشام یانا یانه
 
بو ساچلاریم بویانوب قتلگاهیده قانه
 
دیوم صریح همین قان حسین نشانه سیدور
 
اولونجا حشر منه آغلاماق بهانه سیدور
 
سیزیلدارام دیرم نور هر دو عینیم وای
 
دوزن بلالره مظلوم اُلن حسینیم وای
 
دیمه که عترتیمی بیر دقیقه ترک ایدرم
 
بالالاریم گیده هر سمته آردیجا گیدرم
 
حسین یتیمه لریندن گوتورمرم گوزومی
 
بیر آن چکمرم اطفالیدن گنار اوزومی
 
سینوب قابورقالاریم گرچه ناتوانم من
 
یتیمه قیزلاریما لیک پاسبانم من
 
گیدنده هوشیدن هر بیر یتیم دلخسته
 
محبّتیله باشین آلموشام دیزیم اوسته
 
آلوب او خسته ی آلامی جان تک آغوشه
 
گتورموشم اونی مین رافتیله من هوشه
 
دوشنده خوفه بیری آلموشام اورک سوزونی
 
حسینیمون یرینه اُپموشم گوزل یوزونی
 
ایدنده ناله قیزیم سن فغان و شیونیله
 
اوزومده اولموشام هر یرده همصدا سنیله
 
سنیله هر یره باهم گلوب دولانّام من
 
سسیوه سس ویررم غملریوه یانّام من
 
غرض او نوگل نوخیزی حضرت زهرا
 
او باغبان غمه ویردی دلده شور و نوا
 
او گلعذاری خانم اوز قوجاقینه گوتوروب
 
یوزون اُپه اُپه محنت قطارینه یتوروب
 
ایدوبسن ایمدیکه (تائب) قبول محنت شاه
 
یازاندا یاز سوزیوی خاطِراً لِوَجهِ الله
 
اولار که دیده ی تحقیریله باخور سوزیوه
 
اولوبلا منگر معصوم نه سنون اوزیوه
 
تنور خولیه فریادیلن گلن زهرا
 
تاپار یول اوسته بالاسین بدون چون و چرا
 
او حالیله گوره گر زینب فرشته مآب
 
او یازدیقون تک اولار مطلقاً سوال و جواب
 
شاعر : مرحوم تائب
 
******************
 
 زبانحال حضرت زینب کبری (سلام الله) در غارت خیام
 
گل داده حسین عترت طاهانی سویولار
 
زهرا قیزی صدیقه صغرانی سویولار
 
نه جور و جفادن اوسانولار نه دویولار
 
اهل حرمی سویماقا تشکیل قورولار
 
اطفاله گهی قمچی گهی سیلی وورولار
 
بی نظم قوشون جمع پریشانی سویولار
 
ایتدوقجا بو اشرار عرب هلهله قارداش
 
وحشت ویرور اوز عترت خونین دله قارداش
 
مین وحشت و هولیله قاچولار چوله قارداش
 
چوللرده دوتوب عترت زهرانی سویولار
 
بو چولده گلوب یوم جزا شوری عیانه
 
دامانی دوتوب اود گلوری بعضی فغانه
 
ناچار قاچور أت قاباقینده یانا یانه
 
جبرا دوتوب اول دامنی سوزانی سویولار
 
صحرای بلانی بوریوب بانگ هیا هو
 
بی پرده قاچور چوللره اطفال پری رو
 
اطرافی دوتوب بیر نچه اهریمن بد خو
 
بلقیس صفت أل سلیمانی سویولار
 
خوفیندن اولوبدور بیرینین پاره دوداقی
 
اولموش بیرینین أبله قاچماقدان ایاقی
 
ظلمیله اولوبدور بیرینین یاره دوداقی
 
هر بیر یارالی دیده سی گریانی سویولار
 
بیر یاندا خانم قیزلاریوی أتلار ایاقلار
 
بیر سمتیده أواره قالوب خوردا اشاقلار
 
هر قیز یتوشوب بیر قیزی هولیله قوجاقلار
 
اول حالیله گل چهره صبایانی سویولار
 
یورقون بالالارشوریله فریاده گلولر
 
غربال کیمی گوز یاشینی گوزدن الولر
 
أهوی رمیده کیمی اطفال ، ملولر
 
مین اوچی بیر أهوی گریزانی سویولار
 
اسلامی أتوب دعوی اسلام الینلر
 
الهی دانوب کلمه تکبیر دینلر
 
قر انی ساتوب درهمه قران اوخینلر
 
اهل حرم ناطق قرانی سویولار
 
گل بلبله ننوع ویرر یر بوداقیندا
 
ایله بالاسین هر أنا دوتموش قوجاقیندا
 
میداندا قاچار صاق صولا أتلار قباقینده
 
هم طفلی همی مادر نالانی سویولار
 
اولسون او گوزیندن ایراق ای خسرو خوبان
 
مین غارت ایدن بیر سویولاندور سنه قربان
 
غارت نجه غارت انام اوغلی نجه تالان
 
قوی فاش دیوم زینب کبرانی سویولار
 
باخمولا بالان خسته و بیماریدی قارداش
 
تاب و تبه بو چولده گرفتاریدی قارداش
 
غارت چی جماعت ایله بیعاریدی قارداش
 
اول ناخوش و بیتاب و توانانی سویولار
 
بیر یاندا ألوب شمر الینه خنجر خونخوار
 
سجاده سجادی ایدوب غارت او بیعار
 
بو حالی گوروب خوردا جا قیزلار ایله قورخار
 
قیز لار ملشور عابد نالانی سویولار
 
سجاده وی أچموشدی رقیه یره تازه
 
گوزلوردی سنی گونده کی عادتله نمازه
 
نا گاه دوشوب نقشه سیلی رخ نازه
 
سسلور بابا جان گل سنه جانانی سویولار
 
مقهوریدی بو دشتیده ناکسلره کسلر
 
از بس قاچوب اطفال دوشوب تنگه نفسلر
 
کلثوم علمداریوی امدادینه سسلر
 
امر ایله گله خواهر سقانی سویولار
 
باخمازلا ربابین گلی سولموش بوداقیندا
 
خندان ایلیوب دست اجل غنچه چاقیندا
 
صبری تالانوبدوریری بوشدور قوجاقیندا
 
رحم ایتمیوب اول طاقتی تالانی سویولار
 
شاعر : مرحوم تائب
 
*******************************
 
حضرت زینب کبری (سلام الله)
 
باشه یتوردی عمرینی باشی بلالی زینبون
 
گل آنام اوغلی جان ویرور یاسلی عزالی زینبون
 
عشق مریضدور باجون همدمی دل نواسیدور
 
شربتی اشک چشم تر خون جگر دواسیدور
 
یوخدی یانندا خویش و ائل ناله سی اقرباسیدور
 
سن کیمی جان ویرور غریب ائلدن آرالی زینبون
 
سن بولوسن حسین اوزون من نه قدر وفالیم
 
آیریلقوندا بیر گونی قاره باشی بلالیم
 
روز و شب آغلارام سنه، گولمز اوزوم عزالیم
 
گل بو زماندا قویما تک باشی قرالی زینبون
 
رسمیدی جان ویرن زمان باجی باخار صاقا صولا
 
قارداشا منتظر قالوب گوزلرینی تیکر یولا
 
خاصّه منیم کیمی باجی قارداشا مهربان اولا
 
گل گوزی یولدا قویما چوخ وقت رحالی زینبون
 
سندن اوتور من ایتموشم قان بو گوزومده یاشیمی
 
عالمه ویرموشم نشان شور نهان و فاشیمی
 
شوریله یازموشام آدون دلده بلالی باشیمی
 
کوفه ده هر باخان گوروب باشی حنالی زینبون
 
سندن اوتور ووروب یتن بیر دلیله یارا منه
 
خارجی آد قویوبدیلار فرقه ی اشقیا منه
 
قمچی ووروب جفائیله طایفه ی جفا منه
 
قارداش اولوبدی سن کیمی جسمی یارالی زینبون
 
مهر و محبّتون منی سالدی یارالی داغ داشا
 
چوللری گزدیم آغلادیم جام غمیم داشا داشا
 
دله گوزل آدون سنون عمریمی ویرموشم باشا
 
دلده او مهر گون کیمی یتدی زوالی زینبون
 
سندن اوتور بو باشیمی درد و بلایه سالموشام
 
سندن اوتور خرابه ده من قوری یرده قالموشام
 
سویگلی قیزلارین غمین بو قوری جانه آلموشام
 
راه وفاده طیّ ایدوب حدّ کمالی زینبون
 
سولدوروب آفت خزان اوردا گل بهاریوی
 
اوردا مزاره قویموشام بیر دُرِ شاهواریوی
 
من یانا یانه ترک ایدوب گیتدیم او گلعذاریوی
 
آز قالوب ایتسون آیریلیق فکری خیالی زینبون
 
دوزمدیم، ایستدی زبس گوگلوم او نازدانه نی
 
ایستگیم آرتدی، گوزیاشیم ایلدی تر بو دامنی
 
شامه دوباره جلب ایدوب چکدی علاقه سی منی
 
گتدی مدینه دن بورا شور و نوالی زینبون
 
غربت ایوینده گورماقا گلدیم او زار و بی کسی
 
قالموشیدی قولاقیده بسکه یانقلی ناله سی
 
فرض ایلدیم گلور گینه سویگلون آغلاماق سسی
 
آخدی غمیله عارضه اشک زلالی زینبون
 
یوخ بالان ائیل قبیله سی بوردا ایده مراقبت
 
توزلی مزارینی سیلوب هم ایلیه مواظبت
 
خورداجا قبرینه قالوب قیلّام اوزوم مراقبت
 
دائم آلا کنارینی واردی خیالی زینبون
 
بسکه چوخ ایستدوب اوزون عمّه سینه او خوش سخن
 
علّت اودور که دویمارام قارداش حسین رقیّه دن
 
خوشدی قویام مزاره باش تا دم حشر بوردا من
 
یاتمیا تک بو شامیده ماه جمالی زینبون
 
جان ویرورم اولوب دلیم پرده به پرده قان کیمی
 
سینه می قانلی کوینگون آلموشام ایمدی جان کیمی
 
جامه ی نیلی گیمیشم اگنیمه اوز آنام کیمی
 
درسین آلوب بتولیدن اولدی مثالی زینبون
 
یوخ باشیم اوسته آغلیان، گل بو گون آغلا سن اوزون
 
قلبینی یوخدی داغلیان، سینوی داغلا سن اوزون
 
گوزلرینی ویرنده جان لطفیله باغلا سن اوزون
 
اشگیله بلکه سینه دن درد و ملالی زینبون
 
زینبون ای یارالی گل جان یتیشوب دوداقینه
 
خویش و ائل آختارور باخور گه صولا گاه صاقینه
 
باری اوزون جنازه سین حمل ایله قبر ایاقینه
 
تاپشور اوزون مزاره بو باشی بلالی زینبون
 
بیز ایکی عندلیبیدوق عشقیلی بیر بوداقیده
 
بسلدی فاطمه آنام نازیله بیر قوجاقیده
 
حیف اولا دوشدی مدفنیم سندن اوزاق اوزاقیده
 
قالمادی اولدی شامیده کرب و بلالی زینبون
 
کرب و بلانی ایلدون قارداش حسین مزار سن
 
شامیده ایلرم بنا غصّه لی بیر مزار من
 
عطر وفا آلار منیم قبریمون اوستونه گلن
 
نه باجیدور بولر سنه مهر و وفالی زینبون
 
سندن اگرچه ظلمیله سالدیلار زینبون اوزاق
 
وصله چاتانمادی اولوب مدفنی خانه ی فراق
 
نازلی رقیّه ساخلادی شامیده عمّه سین قوناق
 
حشره کیمی قوناقیدور یاسلی عزالی زینبون
 
ساخلادی شامیده منی حرمتیله بو سویگلوم
 
کرب و بلاده قالدیلار لیک ایکی سولان گلوم
 
اوردا قوناقدور سنه هر ایکی خسته بلبلوم
 
ساخلا عزیز ای شه مُلک جلالی زینبون
 
وار آنام اوغلی تائبین چون بیزه چوخ ارادتی
 
ایسته خداسی لطف ایده سویدوقوموز فصاحتی
 
سوزلری دلنشین گله آرتوق اولا حلاوتی
 
ثبت اولا دفترینده خوش شرح مقالی زینبون
 
شاعر : تائب تبریزی
 
 
************************
 
شاهزاده حضرت علی اصغر (علیه السّلام)
 
من علیّ اصغرم ممتازلر ممتازیم
 
شهریار کربلانین سودامر سربازیم
 
باخمیون سوز عطشدن رنگ رخساریم سولوب
 
سولموشام بیر غنچه ی گل تک بو باغریم قان اولوب
 
بو وجودیم عالم معناده شوریله دولوب
 
دولموشام شوریله حقّین عاشق جانبازیم
 
گلمیشم باطل لر ایچره حق نمایان ایلیم
 
نه دیور پیغمبر اوغلی خلقه اعلان ایلیم
 
آل سفیانی داخی رسوای دوران ایلیم
 
رزمگهده باشهامت شیرخوار غازیم
 
شیرخوارم وار بویوک جدّیّت و جهدیم منیم
 
یاریله باغلانموش اوّل سینمیان عهدیم منیم
 
رخش جنگیدور او پیمان اوسته اوز مَهدیم منیم
 
من الستی عهدیمین باشدان گیچن سربازیم
 
شیرخوارم لیک، شیر، شیرزادِ حیدرم
 
شاخ ایمان غنچه سی ذرّیّه ی پیغمبرم
 
شانیم اکبردور اگرچه شیرخواره اصغرم
 
من حسینین دینینون قربانی ممتازیم
 
سیز منیم بی کس بابامین خوش مرامین بولموسوز
 
عزّت اسلامی ایستر، فکر تامین بولموسوز
 
قالموسوز غفلتده معنای قیامین بولموسوز
 
ای جماعت من حسینین سودامر همرازیم
 
سیل کفر ایستور گلوب قرآن آپارسون برملا
 
بلکه یخسون نخله ی ایمان آپارسون برملا
 
اوخلانام دین اوسته خوشدور قان آپارسون برملا
 
من شکست دینیمون باشدان گیچن نوسازیم
 
مادر آغوشین آتوب خسته جهاده گلمیشم
 
اولموشام آللهه وابسته جهاده گمیشم
 
اوز بابامین اللری اوسته جهاده گمیشم
 
من او شاهین مرغ دست آموز خوش پروازیم
 
دوتمادیم هرچند عاشورا گونونده من ایاق
 
گتدی ال اوسته ولی میدانه دینی اشتیاق
 
شور عشقیمله دولوب دشت همایون عراق
 
تا مخالفلر بوله بو عرصه نین تک تازیم
 
من حسین همکاریم فکریمدی همکاریم منیم
 
عزّت دین اوسته واردور قلب بیداریم منیم
 
جاودانی دور جهاندا زنده افکاریم منیم
 
هرقدر دنیا کهنسال اولسا دامن تازیم
 
دین یولوندا هر جفاگورسم پریشان اولمارام
 
قونداقیم قانیله دولسا درده دلدن دولمارام
 
باغ زهرانین گل شادابیم من سولمارام
 
شاه عشقین گلشن عشقینده غنچه نازیم
 
صید چالاکی ایده لّر بیر سپاهیله شکار
 
مین سپاهی ایلرم من تک نگاهیله شکار
 
بلکه قیلّام هر تک تکین بیر تیر آهیله شکار
 
عرصه ی میدانِ تیرین یاخشی تیراندازیم
 
آل هاشم که شهادتله دوتوب عالمده خو
 
خوشدلم قانه باتام، حلقیم بیچیلمیش سرخ رو
 
سرخ رو اُلسم اولار اسلامیانه آبرو
 
مسلمینین حشره تک سرمایه ی اعزازیم
 
بو حسینین مکتبینده نه صغیر و نه کبیر
 
فرقی یوخدور ایستر اولسون شیرخواره یا که پیر
 
اممیشم پستان دیندن شوقیله بیر عمر شیر
 
شیر مستم راه دینین جان به کف جانبازیم
 
سینیه زینت مدالیله ویرر هر شهریار
 
اوز بابامدور شهریار کشور مُلک وقار
 
سینیه لازمدی نصب ایتسون مدال افتخار
 
من مدال افتخار سینه ی سربازیم
 
نسل آل هاشمه اسلام و قرآندور هدف
 
حقّه جانبدار اولوبلار تک به تک، نه بی طرف
 
منده ده واردور او عالم، منده آختارّام شرف
 
اوز بابام شاه شرفدور من شرف شهبازیم
 
بو بلالی چولده من گوردوم بابام یار آختارور
 
ائل قبیله یوخ یانیندا، یار و غمخوار آختارور
 
سسلوری هَل مِن مُعین یار و مددکار آختارور
 
من او مظلومین دین لبّیک و هم آوازیم
 
شاد اولوب قربان ویرن هر مادران حق پرست
 
دوزمدیم قربان ویرنلردن آنام تاپسون شکست
 
منده قربان اولماقا گلدیم بو گون چون شیر مست
 
قویمارام سینسون آنام قلبی، اونون دمسازیم
 
ادّعای همّتیم لازمدی اثبات ایلسون
 
دینیمه قربان اولوم رفع ملمّات ایلسون
 
تا آنام دنیا بویی منله مباهات ایلسون
 
من آنام آمالینون پایانیم آغازیم
 
دلده خوشدور اوخلانام آه شررپاشیم منیم
 
حلقیمین قانیله رنگین اولسا گوزقاشیم منیم
 
نیزه باشیندا گزه الدن اله باشیم منیم
 
نیزه ده دینین آنام گورسون که سرافرازیم
 
حلقیمی گورسون بیچیلمیش، دلدن اولسون شاد آنام
 
ایلسون تا قید خجلتدن اوزون آزاد آنام
 
شیرخواریندن مباهاتیله ایتسون یاد آنام
 
دینه قربانم او نالانین شعف پردازیم
 
«تائبا» اصغر حسین ابن علی جانانیدور
 
روح نهضتدور قانی، دین خدا قربانیدور
 
مطلعی یاز بیرده بو سوز انقلاب عنوانیدور
 
شهریار کربلانین سودامر سربازیم
 

شاعر : مرحوم تائب تبریزی

 
 
 

 

اين مطلب 3857 بار مشاهده شده است